ბათუმის მერია „ეშმაკის ბორბალს“ 2 წლით, ჯამში 896 500 ლარად ასხვისებს. შესაბამისად, 1 წლით სარგებლობის საფასური 448 250 ლარი იქნება.
ერთი წლით სარგებლობის ფასი იმ აუქციონზე დაფიქსირდა, რომელიც მერიამ გამოაცხადა. აუქციონი შედგა და მასში მონაწილე კომპანიამ ერთი ბიჯით გაიმარჯვა.
ბათუმის მერიაში არ ასაჯაროებენ ინფორმაციას, თუ ვინ გაიმარჯვა აუქციონში.
„გამარჯვებულის ვინაობა კონტრაქტის ოფიციალურად გაფორმების შემდეგ გახდება ცნობილი“ – გვითხრეს მერიაში.
ამ დრომდე „ეშმაკის ბორბალი“ იჯარით გადაცემული იყო შპს „პანორამა 2018“-ზე, რომელმაც წინა აუქციონში გაიმარჯვა. მაშინ აუქციონს ორი მონაწილე ჰყავდა.
„ბათუმელები“ დაუკავშირდა კომპანია „პანორამა 2018“-ს, სადაც დაგვიდასტურეს, რომ ბოლო აუქციონში თავად მონაწილეობდნენ და მერისთან შესაბამისი ხელშეკრულების გაფორმებასაც გეგმავენ – ატრაქციონის მომდევნო 2 წლით სარგებლობაზე.
„ეშმაკის ბორბალზე“ ბილეთის ფასი 10 ლარია. კომპანიაში „ბათუმელებს“ უთხრეს, რომ ბილეთის გაძვირებას არ გეგმავენ.
ხედი ეშმაკის ბორბლიდან / ბათუმი, 10.12.2022
მერიის მიერ გამოცხადებული აუქციონი 2022 წლის 5 დეკემბერს დაიწყო და 19 დეკემბერს დასრულდა.
მანამდე, „ეშმაკის ბორბლის“ საწყისი საიჯარო ქირის განსასაზღვრად, ქალაქის მერიამ საკრებულოს მიმართა.
ამ თემაზე:
ეშმაკის ბორბლის საწყისი ქირა აუქციონზე 435 250 ლარი იქნება – 1 წლით სარგებლობისთვის
