ბათუმის მერიამ ქალაქის საკრებულოს „ეშმაკის ბორბლის“ წლიური სარგებლობის საფასურის დადგენის მიზნით მიმართა – შემდგომში ქონების იჯარით გასაცემად.
მერიაში მიიჩნევენ, რომ ქონების აუქციონზე გატანისას, საწყის ფასად, წინა აუქციონზე ვაჭრობის შედეგად დაფიქსირებული თანხა – 435 250 ლარი უნდა განისაზღვროს.
„ეს დადებითად აისახება ბიუჯეტის საშემოსავლო ნაწილზე… აუქციონში გამარჯვებულის მიერ ბათუმის მუნიციპალიტეტის ბიუჯეტში შეტანილი ქონების სარგებლობის საფასურის სახით, ყოველწლიურად 435 250 ლარის ოდენობით“, – აღნიშნულია მერიის მიერ მომზადებულ პროექტში.
ზღვისპირა პარკის ტერიტორიაზე განთავსებული ატრაქციონი – პანორამული ბორბალი [„ეშმაკის ბორბალი“], მასთან დაკავშირებულ მოწყობილობა-ობიექტებთან და 1419 კვადრატულ მეტრ მიწის ნაკვეთთან ერთად, მერიამ აუქციონზე ბოლოს, 2021 წლის ივნისში გაიტანა.
წინა აუქციონზე საწყისი ფასი 287 250 ლარი იყო [ვაჭრობის ბიჯი 2 000 ლარი]. ქონება 74-ე ბიჯზე გასხვისდა. აუქციონში კი 2 პირი მონაწილეობდა.
აუქციონზე ვაჭრობის შედეგად მაშინ სარგებლობის საფასურად საბოლოოდ 435 250 ლარი დაფიქსირდა და აუქციონში გამარჯვებულთან იმავე წლის 25 ივნისს გაფორმდა ხელშეკრულება [გამარჯვებულად შპს „პანორამა 2018“ გამოვლინდა].
ამ ხელშეკრულების ვადა 2022 წლის ნოემბრის ბოლოს იწურება. შესაბამისად, მერიამ იჯარით გაცემაზე ხელახალი აუქციონი უნდა გამოაცხადოს.
„ეშმაკის ბორბლის“ საწყისი საიჯარო ქირის განსაზღვრაზე ბათუმის საკრებულო 2022 წლის 29 ნოემბერს იმსჯელებს. საკითხი სხდომის დღის წესრიგში შეტანილია.
ბათუმი/ფოტო: „ბათუმელების“ არქივიდან
