კერძო სამხედრო დაჯგუფება „ვაგნერში“ ცდილობენ დაიცვან გამოცდილი ხელმძღვანელები და ჯავშანმანქანები, ხოლო ბევრ მსჯავრდებულს, რომლებიც დაჯგუფებას უერთდებიან, წინა ხაზზე აგზავნიან წინასწარ დაგეგმილი მარშრუტით. ამ მარშრუტიდან გადახვევის შემთხვევაში კი, სავარაუდოდ, მათ ადგილზე მოკვლით ემუქრებიან.
გაერთიანებული სამეფოს დაზვერვის 19 დეკემბრის ანგარიშის ფოკუსში აღმოჩნდა „ვაგნერის“ სასტიკი ტაქტიკა.
როგორც დაზვერვა წერს, „ვაგნერი“ კვლავაც მთავარ როლს ასრულებს დონეცკის ოლქის ქალაქ ბახმუტის ირგვლივ მიმდინარე ბრძოლაში. მან ბოლო თვეებში თავდასხმითი ტაქტიკა განავითარა, რადგან ციხეებიდან წამოყვანილი ახალწვეულების დიდი, თუმცა ცუდად გაწვრთნილი რაოდენობა, მაქსიმალურად სასარგებლოდ გამოიყენა.
ბრიტანული დაზვერვის მონაცემებით, „ვაგნერში“, სავარაუდოდ, ინდივიდუალურ მებრძოლებს აძლევენ სმარტფონებს ან პლანშეტებს, რომლებშიც მოცემულია მათთვის ნაბრძანები მიზანი – წინსვლის მიმართულება და სატელიტის გამოსახულებაზე მონიშნული თავდასხმის ობიექტი.
დაზვერვის ანგარიშის მიხედვით, ოცეულის და უფრო მაღალი დონის ხელმძღვანელები ძირითადად საფარქვეშ რჩებიან და იქიდან დრონების კადრებზე დაყრდნობით გასცემენ ბრძანებებს რადიოსიხშირის მეშვეობით.
ინდივიდებს, ვისაც ეძლევათ ბრძანება გააგრძელონ წინსვლა წინასწარ განსაზღვრულ მარშრუტზე, ხშირად აქვთ საცეცხლე მხარდაჭერა, მაგრამ ნაკლებად ხშირად აქვთ მხარდაჭერა ჯავშანტექნიკით. „დიდი ალბათობით, რიგით ვაგნერელს“, ვინც ნაბრძანები შეტევის მიმართულებიდან უნებართვოდ გადაუხვევს, ადგილზე მოკვლით ემუქრებიან.
ბრიტანული დაზვერვის შეფასებით, ეს ბრუტალური ტაქტიკა მიზნად ისახავს მსჯავრდადებული ახალწვეულების ხარჯზე გადაარჩინოს „ვაგნერის“ იშვიათი აქტივი – გამოცდილი ხელმძღვანელობა და ჯავშანტექნიკა.
მსჯავრდებულ ახალწვეულებს ორგანიზაცია აფასებს, როგორც „გასახარჯს“.
„ვაგნერი“ კერძო სამხედრო დაჯგუფებაა, რომელიც რუსეთის პრეზიდენტის, ვლადიმერ პუტინის „მზარეულმა“, ევგენი პრიგოჟინმა შექმნა. „ვაგნერი“ იბრძოდა სირიაშიც.
