ჩეჩნეთის მეთაურმა, რამზან კადიროვმა, მსოფლიოს მუსლიმებს ჩინურ ენაზე მოუწოდა „გააერთიანონ საერთო ძალისხმევა ნატოს წინააღმდეგ“.
ამის შესახებ რუსული მედია კადიროვის ტელეგრამარხზე დაყრდნობით წერს.
„ბოლო 100 წლის განმავლობაში შეერთებული შტატებისა და ევროპის ორგანიზებით დაიწყო ათობით ომი, სამხედრო გადატრიალება და შემოსევა. მილიონობით მშვიდობიანი მოქალაქე გახდა მათი მსხვერპლი. თუმცა დღეისათვის ისინი კიდევ უფრო დიდ საფრთხეს წარმოადგენენ, რადგან ანადგურებენ ყველა მორალურ ღირებულებას, რაც ხალხებმა შექმნეს კაცობრიობის არსებობის განმავლობაში.
მათი ფული და იარაღი – არაფერია ჩვენი სოლიდარობის, ნებისა და რწმენის წინაშე!“ – წერს კადიროვი.
კადიროვის თქმით, ჩრდილოატლანტიკური ალიანსი საფრთხეს უქმნის მთელი მსოფლიოს არსებობას, „მაგრამ რუსეთი, დასავლეთის ყველა პროგნოზის მიუხედავად, დაუპირისპირდა ამ ბოროტებას და თავდაჯერებულად მიიწევს გამარჯვებისკენ“.
კადიროვმა მოუწოდა მუსლიმებს, „დადგნენ ძმების გვერდით“ და „საერთო მტრის წინააღმდეგ“, რადგან NATO „მალე მივა მათი ოჯახების გასათელად“.
სქრინი კადიროვის მიმართვიდან
რუსეთის რეგულარული არმიის მხარდამხარ უკრაინაში იბრძვიან კადიროველები, ანუ ჩეჩნეთის ლიდერის დაქვემდებარებაში მოქმედი სამხედრო დანაყოფები. თავად რამზან კადიროვი პრეზიდენტ ვლადიმერ პუტინის ერთ-ერთი მნიშვნელოვანი საყრდენია უკრაინის ომში.
