16 დეკემბერს, უკრაინაზე მორიგი რუსული სარაკეტო თავდასხმის დროს, უკრაინის ტერიტორიული თავდაცვის ძალების მებრძოლმა შეძლო და კალაშნიკოვის ტყვიამფრქვევით რუსული მფრინავი რაკეტა ჩამოგდო.
ის უკრაინის დედაქალაქ კიევზე იყო დამიზნებული და დედაქალაქის კიდევ ერთი კრიტიკული ინფრასტრუქტურული ობიექტის განადგურება იგეგმებოდა.
შემთხვევის შესახებ Associated Press-ზე დაყრდნობით მსოფლიო მედია წერს.
უკრაინის დამცველები ჩამოგდებულ რაკეტასთან
ტყვიამფრქვევი, რომლითაც უკრაინის დამცველმა მფრინავი რაკეტა ჩამოაგდო
რაკეტის ფრაგმენტები იმ დანაყოფის პოზიციებიდან არც თუ ისე შორს ჩამოვარდა, სადაც ახალგაზრდა ჯარისკაცი მსახურობდა. სამხედრო მოსამსახურეებმა ამ შემთხვევის დეტალებზე Associated Press-ის ჟურნალისტებთან ისაუბრეს.
მათი მონათხრობის თანახმად, ახალგაზრდა ოფიცერმა მოახერხა და მომაკვდინებელ ჭურვს ფრენა შეაწყვეტინა: ამისთვის კი საკმარისი აღმოჩნდა, რომ მას ხელში ჰქონოდა კალაშნიკოვის ტყვიამფრქვევი.
„მან სწრაფად მოახერხა რეაგირება. ბიჭი ახალგაზრდაა, ენერგიული. მომენტალური რეაქცია ჰქონდა… ეს თითქმის შეუძლებელია, მაგრამ მან ეს მოახერხა. ისე მოხდა, რომ ისინი კარგად რეაგირებდნენ. მათ სროლა იციან“, – განმარტა ჯარისკაცის მეთაურმა, რომლის საბრძოლო სახელია „ჰერა“.
ჯარისკაცის თავის მიერ ჩამოგდებულ მფრინავ რაკეტასთან
ჩამოგდებული მფრინავი რაკეტის ფრაგმენტები
თვითმხილველების თქმით, მას შემდეგ, რაც გასროლილი ტყვია რაკეტას მოხვდა, გარშემო „მწვანე ნაპერწკლები გადმოცვივდა“.
ვიდეოს მიხედვით, მებრძოლმა კალაშნიკოვის 7,62 მმ ტყვიამფრქვევიდან ისროლა.
მებრძოლების თქმით, აფეთქებული რაკეტა ჰაერში ამოტრიალდა და შემდეგ ქვედანაყოფის პოზიციებთან ახლოს, მინდორში ჩამოვარდა.
___
16 დეკემბერს, დილით, რუსეთმა უკრაინაზე მორიგი სარაკეტო შეტევა განახორციელა. რიგ რეგიონებში საჰაერო თავდაცვა მუშაობდა. აფეთქებები მოხდა ხარკოვის, პოლტავას რეგიონებში, ზაპოროჟიეში. კრივოი როგში რუსებმა რაკეტები მარტყეს საცხოვრებელ კორპუსებს: არიან დაღუპულები და დაჭრილები, მათ შორის ბავშვები.
სარაკეტო თავდასხმის შემდეგ, არაერთ რეგიონში, მათ შორის უკრაინის ორ უდიდეს ქალაქში – კიევსა და ხარკოვში გამოირთო ელექტროენერგია, შეფერხდა გათბობა და წყალმომარაგება.
უკრაინის შეიარაღებული ძალების მთავარსარდლის, ვალერი ზალუჟნის განცხადებით, უკრაინაზე ბოლო თავდასხმის დროს რუსეთმა 76 რაკეტა გაუშვა. უკრაინის დამცველებმა მათგან 60-ის ჩამოგდება მოახერხეს.
