უკრაინის პრეზიდენტის, ვოლოდიმირ ზელენსკის თქმით, რუსეთს სურს უკრაინაზე შური იძიოს. მისი თქმით, უკრაინა ათვიცნობიერებს, რომ შესაძლებელია 2023 წელს რუსეთის ფედერაციამ ახალი შეტევა წამოიწყოს უკრაინის წინააღმდეგ. მით უფრო, რომ რუსებს ამაზე არასდროს უთქვამთ უარი.
ამის შესახებ პრეზიდენტმა ვლადიმირ ზელენსკიმ TF1 INFO-სთან ინტერვიუში განაცხადა. მისი თქმით, საქმე შემდეგშია – რამდენად შესწევს რუსეთს ძალა ახალი თავდასხმისთვის.
„დიახ, ჩვენ ამას ბოლომდე ვაცნობიერებთ. ჩვენ შეგვიძლია გავიგოთ მათი შურისძიების სურვილი, ეს რჩება მათ აკვიატებად, სურვილი თავს დაესხან ჩვენს ქვეყანას, მოახდინონ ჩვენი ტერიტორიების ოკუპაცია. მე მიმაჩნია, რომ ისინი არასდროს იტყვიან უარს ამ პროექტზე. მაგრამ საქმე იმაშია, შეუძლიათ თუ არა მათ ამის გაკეთება? და შეგვიძლია თუ არა ჩვენ ამას გავუმკლავდეთ? დარწმუნებული ვარ, რომ მათი სურვილი, მიაღწიონ ამას, ჯერ კიდევ არსებობს“, – განმარტა უკრაინის ლიდერმა.
ახალი შეტევის საფრთხეზე ისაუბრა უკრაინის შეიარაღებული ძალების მთავარსარდალმა, ვალერი ზალუჟნიმაც. მისი თქმით, კიევზე ხელახალი თავდასხმისთვის რუსეთის ფედერაცია დაახლოებით 200 000 ახალ ჯარისკაცს ამზადებს.
უკრაინის თავდაცვის მინისტრი ოლექსი რეზნიკოვი ასევე მიიჩნევს, რომ რუსეთის ფედერაციას სურს შეტევის ახალი ტალღის დაწყება 2023 წლის თებერვალში.
ამავე დროს, ამერიკელი გენერალ-ლეიტენანტი და ევროპაში აშშ-ის ჯარის ყოფილ სარდალი, ბენ ჰოჯესი დარწმუნებულია, რომ ნაკლებად სავარაუდოა რუსეთის ფედერაციამ შეძლოს საჭირო რაოდენობის კარგად მომზადებული სამხედრო პერსონალის კონცენტრირება უკრაინაში ახალი შეტევის წამოსაწყებად.
___
აშშ-ის ომის კვლევის ინსტიტუტის [ISW] ანალიტიკოსების დღევანდელი ანგარიშის მიხედვით, უკრაინაში რუსეთის ომის დასაწყისში პრეზიდენტმა ვლადიმერ პუტინმა ჩეჩნეთის ლიდერს, რამზან კადიროვს კიევში სამთავრობო შენობების დაკავება და ვოლოდიმირ ზელენსკის მოკვლა უბრძანა.
