უკანასკნელი ინფორმაციით, მოსკოვის ოლქში, სავაჭრო ცენტრ „მეგა ხიმკიში“ გაჩენილი ხანძრის შედეგად ერთი ადამიანი დაიღუპა. რუსული მედიის ცნობით, ის სავარაუდოდ, ცენტრის დარაჯი იყო და მისი ცხედარი ცეცხლის ჩაქრობისას იპოვეს.
სავაჭრო ცენტრში, რომელიც ქალაქ მოსკოვისა და ოლქის საზღვარზე, მოსკოვის წრიულ საავტომობილო გზასთან მდებარეობს, ცეცხლი დაახლოებით დილის 6 საათზე გაჩნდა.
მედიის ინფორმაციით, ხანძარი თავდაპირველად სამშენებლო ჰიპერმარკეტის სახურავში გაჩნდა და ჯამში 17 ათას კვადრატულ მეტრ ტერიტორიას მოედო. ხანძრის პარალელურად, რამდენიმე აფეთქება მოხდა სამშენებლო-სარემონტო მასალების საწყობებში.
რუსეთის საგანგებო სიტუაციების სამსახურის ცნობით, ცეცხლი 8.35 საათზე ჩააქრეს.
კრემლისტური მედია იუწყება, რომ ხანძრის გაჩენის მთავარი ვერსია ცეცხლის წაკიდებაა, თუმცა როგორც „ინტერფაქსს“ საგანგებო სამსახურიდან წყარომ უთხრა, ასევე განიხილება სხვა ვერსიებიც, „მათ შორის, ტექნიკური – მოკლე ჩართვა“.
აღძრულია სისხლის სამართლის საქმე უსაფრთხოების ზომების დარღვევის მუხლით. „მეგა ხიმკისთვის“ ხანძრის შედეგად მიყენებული ზიანი წინასწარი შეფასებით 20-30 მილიონი რუბლია (300-500 ათასი დოლარი).
9 დეკემბერს ხანძარი გაუჩნდა კიდევ ერთ ქარხანას რუსეთში, ამჯერად საბურავების ქარხანა იწვის ბარნაულში
9 დეკემბერს, დილით, რუსეთში კიდევ ერთი ხანძარი გაჩნდა. ცეცხლი გაუჩნდა საბურავების ქარხანას ბარნაულში. კრემლისტური მედიის ცნობით, ცეცხლი ერთ-ერთ საწარმოო შენობაში გაჩნდა.
