„ქართული ოფისის“ შენობასთან საპროტესტო აქცია მიმდინარეობს. აქ შეკრებილი მოქალაქეები საქართველოს მესამე პრეზიდენტს, მიხეილ სააკაშვილს სოლიდარობას უცხადებენ. შენობის წინ პოლიციაა მობილიზებული და აქციის მონაწილეებს ოფისის ეზოში შესვლის საშუალებას არ აძლევს.
„თავისუფლება სააკაშვილს“ – „ქართული ოცნების“ ოფისის წინ აქცია მიმდინარეობს.
ფოტო: მარიამ ბოგვერაძე/ნეტგაზეთი
აქციაზე იმყოფება პარლამენტის წევრი ენმ-დან ხატია დეკანოიძეც. „ეს არის ჩემი მეგობრების მიერ დაანონსებული აქცია, რადგან მიხეილ სააკაშვილის ჯანმრთელობის მდგომარეობა არის იმ კონდიციაში, რა კონდიციაც წარმოუდგენლად მძიმეა. მათ შორის წარმოუდგენელია საზოგადოებისთვის და ქვეყნის მომავლისთვის.
არ აქვს მნიშვნელობა, რომელ პოლიტიკურ პლატფორმაზე ვდგავართ, ჩვენ ყველა უნდა გავერთიანდეთ იმისთვის, რომ ეს ადამიანი გადარჩეს.
მოქალაქეები „ქართული ოცნების“ ოფისის წინ
მე დიდი იმედი მაქვს და ყოველგვარი პოლიტიკური კონტექსტის გარეშე ვამბობ, რომ სასამართლო მიიღებს სამართლებრივ გადაწყვეტილებას, რაც არის მისი გადაყვანა და გათავისუფლება. სხვაგვარად, წარმოუდგენელია მისი ჯანმრთელობის მდგომარეობის გაუმჯობესება“, – ამბობს ხატია დეკანოიძე.
აქციაზე ენმ-ს თავმჯდომარეობის სამივე კანდიდატი იმყოფება.
სააკაშვილის სოლიდარობის აქცია თბილისში. ფოტო: მარიამ ბოგვერაძე/„ნეტგაზეთი“
„ჩვენი მოთხოვნაა, რაც შეიძლება სწრაფად მოხდეს სასამართლოს ჩანიშვნა იმიტომ, რომ ყოველი წუთი, ყოველი საათი შესაძლოა გადამწყვეტი აღმოჩნდეს პრეზიდენტ სააკაშვილის ჯანმრთელობისთვის. ყველამ ერთმანეთს მივცეთ პირობა, რომ როგორც კი ჩაინიშნება სასამართლო, კიდევ უფრო მეტნი, კიდევ უფრო მობილიზებულები ვიდგეთ იქ და დავიცავთ პრეზიდენტის სიცოცხლეს“, – განაცხადა ლევან ხაბეიშვილმა აქციაზე.
„ქართული ოცნების “ ოფისის წინ პოლიციაა მობილიზებული.
ფოტო: მარიამ ბოგვერაძე/ნეტგაზეთი
„მე ვფიქრობ, რომ ხელისუფლება ერთადერთ შემთხვევაში წავა დათმობაზე – თუ ოპოზიციურ ფლანგზე იქნება დიდი ერთობა, ანგარიშგასაწევი ძალა, რომელიც ხელისუფლებას აიძულებს დათმობებზე წავიდეს. სხვა შემთხვევაში, არა მგონია, რომ ესენი არიან ხალხი, რომლებიც დათმობაზე წავლენ ან ჯანმრთელობის გაუარესების გამო ან იმის გამო, რომ ქვეყანაში არის პოლიტიკური დევნა, თუნდაც სააკაშვილთან მიმართებაში.
ეს ადამიანი (ბიძინა ივანიშვილი) უკანდახევას უყურებს როგორც სისუსტის გამოვლინებას. ერთადერთი, რამაც შეიძლება უკან დაახევინოს, მათ შორის გადაიდგას ნაბიჯი სააკაშვილის გასათავისუფლებლად, თუ იქნება ანგარიშგასაწევი ძალა. ასეთ ძალას კი ავტოკრატიებში ქმნის მხოლოდ ერთობა“, – ამბობს აქციაზე მყოფი ზურა გირჩი ჯაფარიძე.
