ნეტგაზეთი • RU
gemi

რუსეთმა შავი ზღვის ფლოტის საბრძოლო შემადგენლობის 15% დაკარგა ომში – მედია

24 თებერვლამდე რუსეთის შავი ზღვის ფლოტი 275 ხომალდს ითვლიდა, მათგან მხოლოდ 58 იყო საბრძოლო, თუმცა საპატრულო კატერების ჩათვლით, საერთო ჯამში, რუსეთი შავი ზღვის ფლოტში 74 საბრძოლო ერთეული შედიოდა.

როგორც რუსული გამოცემა „პროექტი“ წერს, ომის დაწყების შემდეგ, შავი ზღვის ფლოტის 12 ხომალდი და კატერი ჩაიძირა ან დაზიანდა. ჟურნალისტების შეფასებით, რუსეთისთვის ეს ძალიან სერიოზული დანაკარგია.

„თუ შევაჯამებთ ყველა საჯარო მონაცემს ხომალდების დანაკარგების შესახებ, გამოჩნდება, რომ უკრაინასთან ომის განმავლობაში შავი ზღვის ფლოტმა დაკარგა 12 ხომალდი და კატერი, რაც მისი საბრძოლო შემადგენლობის, 74 ერთეულის, 15%-ია,“ – წერს „პროექტი“.

უკრაინის გენშტაბის უახლესი მონაცემებით, სრულმასშტაბიანი ომის დაწყების შემდეგ უკრაინის არმიამ რუსების 16 მცურავი საშუალება გაანადგურა, მათ შორის საბრძოლო გემები და კატერები.

ყველაზე ძვირადღირებული დანაკარგი აღმოჩნდა კრეისერი „მოსკვა“. შავი ზღვის ფლოტის ფლაგმანი მოსკოვს, Forbes-ის შეფასებით, $ 750 მილიონი დაუჯდა.  

$75 მილიონის ღირებულების იყო სადესანტო ხომალდი „სარატოვი“, ხომალდი „ვასილი ბეხი“ კი – $21 მილიონის.

რუსული და უკრაინული საინფორმაციო წყაროების ცნობით, 18 ნოემბერს, თავდასხმა მოხდა ნოვოროსიისკის პორტის ნავთობტერმინალზე, რომლის სიახლოვესაც რუსეთის შავი ზღვის ფლოტის უმსხვილესი ბაზაა.

რუსეთმა თავისი საზღვაო ოპერაციების დიდი ნაწილი ნოვოროსიისკში მას შემდეგ გადაიტანა, რაც ზაფხულში, ოკუპირებულ ყირიმში მდებარე სევასტოპოლის ბაზას უკრაინელებმა დაარტყეს.

18 ნოემბრის ინციდენტის დეტალები არ გახმაურებულა, თუმცა დიდი ბრიტანეთის დაზვერვის შეფასებით, ნებისმიერი ფორმით იმის დემონსტრირება, რომ უკრაინას ნოვოროსიისკის პორტისთვის საფრთხის შექმნა შეუძლია, რუსეთისთვის კიდევ ერთ სტრატეგიულ გამოწვევად იქცევა და შავ ზღვაში მის ისედაც შემცირებულ გავლენას კიდევ უფრო დაასუსტებს.

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.