ნეტგაზეთი • RU

უკრაინა რუსეთის გავლენის ცენტრებთან აფილირებულ რელიგიურ ორგანიზაციებს კრძალავს

უკრაინის უსაფრთხოებისა და თავდაცვის ეროვნული საბჭო რუსეთის გავლენის ცენტრებთან დაკავშირებული რელიგიური ორგანიზაციების აკრძალვას ითხოვს. საბჭომ უკვე დაავალა მინისტრთა კაბინეტს, მოამზადოს და უმაღლეს რადას წარუდგინოს შესაბამისი საკანონმდებლო წინადადება.

„დღეს შედგა უსაფრთხოებისა და თავდაცვის საბჭოს სხდომა. სხდომა, რომელზეც ჩვენ განვიხილეთ უკრაინაში არსებული რელიგიური წრეების აგრესორ-ქვეყანასთან კავშირების არაერთი ფაქტი,“ – განაცხადა უკრაინის პრეზიდენტმა ვოლოდიმირ ზელენსკიმ თავის საღამოს ვიდეომიმართვაში.

ზელენსკის თქმით, სამუშაო პროცესი რამდენი ეტაპად დაიყოფა:

უსაფრთხოებისა და თავდაცვის საბჭომ უკვე დაავალა მთავრობას უმაღლეს რადაში განსახილველად შეიტანოს კანონპროექტი, რომელიც უკრაინაში რუსული გავლენის ცენტრებთან აფილირებული რელიგიური ორგანიზაციების საქმიანობას აკრძალავს.

შესაბამის სახელმწიფო სამსახურს ასევე დაევალა, ექსპერტიზა ჩაუტაროს უკრაინის მართლმადიდებელი ეკლესიის წესდებას მოსკოვის საპატრიარქოსთან საეკლესიო-კანონიკური კავშირების გასარკვევად და საჭიროების შემთხვევაში, მიიღოს კანონით გათვალისწინებული ზომები.

ყველა იმ ორგანოს, რომელთა მოვალეობაშიც შედის ქვეყნის ნაციონალური უსაფრთხოების უზრუნველყოფა, დაევალა, გააქტიუროს ღონისძიებები საეკლესიო სივრცეში რუსეთის სპეცსამსახურების მუშაობის გამოსავლენად და გამოიყენოს პერსონალური სანქციები.

პრეზიდენტის თქმით, აუცილებელია გაიზარდოს ეთნოპოლიტიკისა და სინდისის თავისუფლების საკითხებში სახელმწიფო სამსახურის უფლებამოსილებაც, რაც მას საშუალებას მისცემს, დაიცვას უკრაინელებისა და უკრაინული სახელმწიფოს კანონიერი ინტერესები.

„ამ და ყველა სხვა გადაწყვეტილებით, უკრაინაში გარანტირებული იქნება რწმენის თავისუფლება. ჩვენ არავის მივცემთ უფლებას, უკრაინულ სულში იმპერია ააშენოს.

სამწუხაროდ, რუსეთის ტერორმა და სრულმასშტაბიანმა ომმაც კი ვერ დაარწმუნა ზოგიერთი მოღვაწე, რომ ბოროტების ცდუნება უნდა დასძლიოს. რას ვიზამთ, ჩვენ უნდა შევქმნათ პირობები, რომელშიც აგრესორ სახელმწიფოზე დამოკიდებულ მოთამაშეებს არ ექნებათ უკრაინელებით მანიპულირებისა და უკრაინის შიგნიდან დასუსტების შესაძლებლობა,“ – ამბობს ზელენსკი.

პრეზიდენტის თქმით, დაიწყება იმის შესწავლაც, რამდენად კანონიერად იმყოფება მოსკოვის საპატრიარქოს უკრაინული ეკლესია კიევ-პეჩორის ლავრაში.

1051 წელს დაარსებული კიევ-პეჩორის ლავრა, ცნობილი ასევე, როგორც კიევის ქვაბულთა ლავრა, კიევის ერთ-ერთი უძველესი სამონასტრო კომპლექსია. ის მოსკოვის საპატრიარქოს უკრაინის მართლმადიდებელი ეკლესიის მთავარი შტაბ-ბინა და ეკლესიის მეთაურის რეზიდენციაა.

იუნესკოს მსოფლიო მემკვიდრეობის ძეგლთა სიაში შეტანილ სამონასტრო კომპლექსზე კონტროლს დღეს უკრაინის სახელმწიფო მუზეუმი და მოსკოვის საპატრიარქოს უკრაინის მართლმადიდებელი ეკლესია ინაწილებენ.

რა უძღოდა წინ უკრაინის ხელისუფლების გადაწყვეტილებას:

უკვე მესამე კვირაა, უკრაინის უშიშროების სამსახური განაგრძობს შემოწმებასა და დაკითხვებს მოსკოვის საპატრიარქოს დაქვემდებარებულ უკრაინული მართლმადიდებელი ეკლესიის ობიექტებში.

უწყების ცნობით, რამდენიმე დღის წინ დიდი რაოდენობით ანტიუკრაინული ლიტერატურა აღმოაჩინეს პოჩაევის სასულიერო სემინარიასა და ივანო-ფრანკოვსკის ეპარქიაში – „ბროშურები და წიგნები სავსეა სიძულვილის ენით და მათში უარყოფილია უკრაინელი ერისა და სახელმწიფოს არსებობა.“

25 ნოემბერს უკრაინის უშიშროების სამსახურმა ჩხრეკა ჩაატარა ჩერნოვიც-ბუკოვინის ეპარქიაში, რომელიც ასევე მოსკოვის საპატრიარქოს უკრაინის მართლმადიდებელ ეკლესიას ემორჩილება.

უწყების ინფორმაციით, ამოღებულია დოკუმენტები, რომლებიც ადასტურებს, რომ ეპარქიის ხელმძღვანელთა ნაწილი რუსეთის მოქალაქეა; მოსკოვიდან მიღებული ინსტრუქციები, რომლებსაც საეკლესიო მსახურებისას იყენებდნენ და დიდი რაოდენობით კრემლისტური ლიტერატურა.

22 ნოემბრის დილით უშიშროების სამსახური შევიდა კიევ-პეჩორის ლავრაში.

იმავე დღეს უშიშროების სამსახურმა დაიწყო ჩხრეკა კორეცკის წმინდა სამების მონასტერსა და სარნი-პოლესსკის ეპარქიაში;

ჩხრეკის მეორე დღეს უკრაინელმა სამართალდამცველებმა გაავრცელეს ინფორმაცია, რომ დაიკითხა 350 სასულიერო პირი, კიევ-პეჩორის ლავრიდან კი ამოიღეს პრორუსული და პროპაგანდისტული ლიტერატურა, რომელიც სემინარიასა და ეკლესიის სკოლებში სწავლებისას გამოიყენებოდა, 2 მილიონი გრივნა (100 ათასი დოლარი) და რამდენიმე ათასი რუსული რუბლი.

უშიშროების ოპერაციას მოსკოვმა „რუსეთის მართლმადიდებელ ეკლესიასთან კიევის ომი უწოდა“;

ამერიკული გამოცემა The New York Times-ის ინფორმაციით, ომის დაწყების შემდეგ უკრაინაში რუსეთის ხელშეწყობის ბრალდებით 33 სასულიერო პირი დააკავეს.

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.