The New York Times-ის ცნობით, ომის დაწყების შემდეგ უკრაინაში 33 სასულიერო პირი დააკავეს რუსეთისთვის ინფორმაციის შეგროვებისა და მიწოდების ბრალდებით.
გამოცემა ინფორმაციის წყაროდ უკრაინის ოფიციალურ პირებს ასახელებს, თუმცა არ აკონკრეტებს, რომელ ეკლესიას მიეკუთვნებოდნენ დაკავებული სასულიერო პირები – მოსკოვის საპატრიარქოს უკრაინულ მართლმადიდებელ ეკლესიას, ავტოკეფალიურ ეკლესიას, თუ რომელიმე სხვა კონფესიას.
The New York Times-ი წერს, რომ რუსეთის უკრაინაში შეჭრის შემდეგ ასობით სასულიერო პირი მოსკოვის საპატრიარქოს დაქვემდებარების ქვეშ მყოფ უკრაინულ ეკლესიას გამოეყო და კიევის დამოუკიდებელ ეკლესიას შეუერთდა, თუმცა რუსული ეკლესია უკრაინაში დღემდე დიდ გავლენას ინარჩუნებს.
გუშინ ცნობილი გახდა, რომ უკრაინის უშიშროების სამსახური კიევ-პეჩორის ლავრაში შევიდა და ჩხრეკა დაიწყო. უწყების ცნობით, ეროვნულ პოლიციასა და გვარდიასთან ერთად, სამონასტრო კომპლექსში მიმდინარეობდა „კონტრდაზვერვის ღონისძიებები უკრაინაში რუსეთის სპეცსამსახურების საქმიანობის აღსაკვეთად“.
უშიშროების განმარტებით, „ოპერაციის მიზანია“ არ დაუშვან ლავრის გამოყენება „რუსული სამყაროს“ თავშესაფრად; გაარკვიონ, ხომ არ აფარებენ თავს უკრაინის მართლმადიდებელი ეკლესიის შენობებს სადაზვერვო-დივერსიული ჯგუფები და უცხოეთის მოქალაქეები, ან ხომ არ ინახება იარაღი.
კიევ-პეჩორის ლავრიდან ამოღებული პრორუსული ლიტერატურა/ფოტო: უკრაინის უშიშროება
გუშინვე ცნობილი გახდა, რომ კიევ-პეჩორის ლავრის გარდა, უკრაინის უშიშროება შევიდა კორეცკის წმინდა სამების მონასტერსა და სარნი-პოლესსკის ეპარქიაში.
უშიშროების სამსახურმა დღეს გაავრცელა ინფორმაცია, რომ კონტრდაზვერვის ღონისძიებები დასრულდა კიევ-პეჩორის ლავრაში, კორეცკის წმინდა სამების მონასტერსა და სარნი-პოლესსკის ეპარქიაშიც. სამივე მათგანი მოსკოვის ეპარქიის უკრაინის მართლმადიდებელ ეკლესიას ემორჩილება.
უშიშროების პრესსამსახურის ცნობით, შემოწმდა 350-ზე მეტი საეკლესიო ობიექტი და 850 ადამიანი. მათგან 50 პოლიგრაფის საშუალებით დაიკითხა. მათ შორის იყვნენ არამხოლოდ უკრაინის მოქალაქეები, არამედ მონასტრების ტერიტორიაზე მყოფი რუსეთის მოქალაქეები.
„ზოგიერთმა მათგანმა შემოწმებისას წარმოადგინა საბჭოთა კავშირის დროინდელი პასპორტები და სამხედრო ბილეთები, ასლები, დოკუმენტების დედნები არ ჰქონდათ, ან ჰქონდათ უკრაინის მოქალაქის პასპორტი, რომელსაც დაზიანება ან გაყალბების კვალი ეტყობოდა“, – ნათქვამია უშიშროების განცხადებაში.
კიევ-პეჩორის ლავრის ტერიტორიაზე აღმოაჩინეს 32 წლის უკრაინელი, რომელიც პრორუსულ საინფორმაციო სააგენტო „ანტვანისთვის“ მუშაობდა. ჩხრეკისას ასევე აღმოჩნდა: პრორუსული და პროპაგანდისტული ლიტერატურა, რომელიც სემინარიასა და ეკლესიის სკოლებში სწავლებისას გამოიყენებოდა, 2 მილიონი გრივნა (100 ათასი დოლარი) და რამდენიმე ათასი რუსული რუბლი.
კიევ-პეჩორის ლავრიდან ამოღებული ფული/ფოტო: უკრაინის უშიშროება
უშიშროების სამსახურის ოპერაციას კრემლმა კიევის „რუსეთის მართლმადიდებელ ეკლესიასთან ბრძოლის დადასტურება“ უწოდა. ვლადიმირ ლეგოიდამ, რუსეთის საპატრიარქოს პრესსპიკერმა განაცხადა, რომ ოპერაციის მიზანია იმ ერთადერთი ინსტიტუტის „დაშინება“, რომელშიც „რუსები და უკრაინელები მშვიდობისთვის ერთად ლოცულობენ“.
უშიშროება კიევ-პეჩორის ლავრაში მას შემდეგ შევიდა, რაც რამდენიმე დღის წინ უკრაინის ავტოკეფალიური მართლმადიდებელი ეკლესიის სასულიერო პირმა მიხაილ ომელიანმა გამოაქვეყნა ვიდეო, რომელშიც ისმის, როგორ ასრულებს გუნდი კიევ-პეჩორის ლავრაში პრორუსულ სიმღერას. ვიდეოში ისმის სიტყვებიც „იღვიძებს დედა რუსეთი“.
1051 წელს დაარსებული კიევ-პეჩორის ლავრა, ცნობილი ასევე, როგორც კიევის ქვაბულთა ლავრა, კიევის ერთ-ერთი უძველესი სამონასტრო კომპლექსია. ის მოსკოვის საპატრიარქოს უკრაინის მართლმადიდებელი ეკლესიის მთავარი შტაბ-ბინა და ეკლესიის მეთაურის რეზიდენციაა.
მთავარ ფოტოზე: უკრაინის უშიშროების თანამშრომლები კიევ-პეჩორის ლავრაში/ფოტო: უკრაინის უშიშროების სამსახური
