უკრაინის უშიშროების სამსახურმა ჩხრეკა ჩაატარა ჩერნოვიც-ბუკოვინის ეპარქიაში, რომელიც მოსკოვის საპატრიარქოს უკრაინის მართლმადიდებელ ეკლესიას ემორჩილება.
უწყების ცნობით, ჩხრეკის შედეგად ამოღებულია დოკუმენტები, რომლებიც ადასტურებს, რომ ეპარქიის ხელმძღვანელობა რუსეთის მოქალაქეა; მოსკოვიდან მიღებული ინსტრუქციები, რომლებსაც საეკლესიო მსახურებისას იყენებდნენ და დიდი რაოდენობით კრემლისტური ლიტერატურა.
„საგამოძიებო მოქმედებების შედეგად, სამართალდამცველებმა აღმოაჩინეს დოკუმენტები, რომლებიც ადასტურებს, რომ ეპარქიის სტრუქტურების ხელმძღვანელ პირთა ნაწილს რუსეთის მოქალაქეობა აქვს. ასევე, გამოაშკარავებულია ეპარქიის ხელმძღვანელობის მოსკოველ კურატორებთან მიმოწერა, რომელშიც ჩანს, რომ ისინი იღებდნენ ინსტრუქციებს სრულმასშტაბიანი ომის დაწყების შემდეგ საეკლესიო ლიტურგიების ჩატარების „სპეციფიკასთან“ დაკავშირებით“ – ნათქვამია უშიშროების განცხადებაში.
უწყების ინფორმაციით, ამ წერილებში რუსეთის მართლმადიდებელი ეკლესიის წარმომადგენლები მოითხოვდნენ ეპარქიის სასულიერო პირებისგან, საეკლესიო მსახურებისას უარეყოთ რუსეთის სამხედრო აგრესია და „მოსკოვის ეკლესიის“ შევიწროების შესახებ ელაპარაკათ.
უშიშროების სამსახური აღნიშნავს, რომ ასევე აღმოაჩინეს საწყობები, სადაც ინახებოდა კრემლისტური ლიტერატურა, რომელშიც რუსეთის ქება და მისი მხარდაჭერისკენ მოწოდებებია. ეპარქიის ხელმძღვანელების კომპიუტერებში კი ნაპოვნია ფოტო მოწმობები იმ რუსების შესახებ, რომლებიც უკრაინის წინააღმდეგ საბრძოლო მოქმედებებში მონაწილეობდნენ. ერთ-ერთია 2014 წელს ყირიმის დაპყრობისთვის რუსეთის თავდაცვის მიერ გაცემული „რუსეთის გმირის“ მოწმობა.
გამოძიება სახელმწიფო ღალატის მუხლით მიმდინარეობს.
უკრაინის უშიშროების ოპერაცია მოსკოვის საპატრიარქოს უკრაინის მართლმადიდებელი ეკლესიის ეპარქიებში – მოკლედ:
22 ნოემბრის დილით უშიშროების სამსახური შევიდა კიევ-პეჩორის ლავრაში;
იმავე დღეს, უშიშროების სამსახურმა დაიწყო ჩხრეკა კორეცკის წმინდა სამების მონასტერსა და სარნი-პოლესსკის ეპარქიაში;
უწყების ცნობით ოპერაციის მიზანია „კონტრდაზვერვის ღონისძიებების გატარება უკრაინაში რუსეთის სპეცსამსახურების საქმიანობის აღსაკვეთად“;
ჩხრეკის მეორე დღეს უკრაინელმა სამართალდამცველებმა გაავრცელეს ინფორმაცია, რომ დაიკითხა 350 სასულიერო პირი, კიევ-პეჩორის ლავრიდან კი ამოიღეს პრორუსული და პროპაგანდისტული ლიტერატურა, რომელიც სემინარიასა და ეკლესიის სკოლებში სწავლებისას გამოიყენებოდა, 2 მილიონი გრივნა (100 ათასი დოლარი) და რამდენიმე ათასი რუსული რუბლი.
უშიშროების ოპერაციას მოსკოვმა „რუსეთის მართლმადიდებელ ეკლესიასთან კიევის ომი უწოდა“;
ამერიკული გამოცემა The New York Times-ის ინფორმაციით, ომის დაწყების შემდეგ უკრაინაში რუსეთის ხელშეწყობის ბრალდებით 33 სასულიერო პირი დააკავეს.
