აშშ-ის სახელმწიფო მდივნის, ენტონი ბლინკენის განცხადებით, პუტინმა მთელი თავისი „რისხვა და ცეცხლი“ უკრაინის მოქალაქეებისკენ მიმართა, თუმცა რუსეთის ახლანდელი სტრატეგია მიზანს მაინც ვერ მიაღწევს.
„გათბობა, წყალი, ელექტროენერგია… პრეზიდენტ პუტინის ახალი სამიზნეებია და ძალიან ძლიერად ურტყამს მათ,“ – თქვა ბლინკენმა ბუქარესტში NATO-ს ორდღიანი სამიტის შემდეგ გამართულ პრესკონფერენციაზე.
მისი თქმით, პუტინი ცდილობს, კიევს მოკავშირეები ჩამოაშოროს და აიძულოს დასავლეთი, უკრაინა შიმშილისა და ყინვისთვის გაწიროს.
„ეს სტრატეგია არ მუშაობს და არც იმუშავებს. ჩვენ დავამტკიცებთ, რომ რუსეთი ცდება. სწორედ ამას ვისმენდი ხმამაღლა და ცხადად თითოეული ქვეყნისგან ბუქარესტში,“ – დასძინა ბლინკენმა.
სახელმწიფო მდივნის განცხაებით, NATO-ს მინისტერიალის მთავარი გზავნილი ასეთი იყო: „ჩვენი საერთო ძალისხმევა უკრაინის მხარდასაჭერად ურყევად გაგრძელდება. ახლა, ამ ზამთრის განმავლობაშიც და იმდენ ხანს, რამდენიც უკრაინას მიზნის მისაღწევად დასჭირდება“.
შეერთებულმა შტატებმა სამშაბათს უკრაინისთვის $53-მილიონიანი დახმარების შესახებაც გამოაცხადა. თანხა განკუთვნილია უკრაინის ელექტროქსელისთვის საჭირო აღჭურვილობის შესაძენად.
რუსეთი სავარაუდოდ მორიგი მასშტაბური სარაკეტო დაბომბვისთვის ემზადება – Der Spiegel
