უკრაინაში რუსეთის არმიის პირველი მარცხის შემდეგ, ძალაუფლების მქონე პირები კრემლში რუსეთის მხრიდან უკრაინაში ბირთვული იარაღის გამოყენების შესაძლებლობას განიხილავდნენ.
ამერიკული Newsweek-ის ინფორმაციით, ამის შესახებ რუსეთის უსაფრთხოების ფედერალური სამსახურიდან გაჟონილ წერილებშია ლაპარაკი.
გამოცემის ცნობით, ФСБ-ს საიდუმლო ინფორმაციის შემცველი წერილები დათარიღებულია 17 მარტით, 21 მარტით, 12 აპრილით და ისინი ФСБ-ს აგენტმა გაუგზავნა ადამიანის უფლებადამცველ რუს აქტივისტს, ვლადიმირ ოსეჩკინს, რომელიც ამჟამად საფრანგეთში იმყოფება და იქიდან მართავს ცნობილ ანტიკორუფციულ ვებსაიტს – Gulagu.net-ს.
ინფორმატორი აგენტის ცნობით, ბირთვული იარაღის გამოყენების შესაძლებლობას რუსი გენერლები და ФСБ–ს თანამშრომლები განიხილავდნენ, ამ საუბრებს თავად პუტინი არ ესწრებოდა.
გამოცემა აღნიშნავს, რომ საუბრის მონაწილეთა უმრავლესობა ვარაუდობდა, რომ პუტინი არ დათანხმდებოდა ბირთვული იარაღის გამოყენებას, რადგან ეს მოწინააღმდეგეებისა და ნეიტრალური ქვეყნების თვალში „რუსეთის დამარცხებად“ გამოჩნდებოდა.
„ეს აჩვენებდა სამხედრო სისუსტეს, რომელსაც ვერანაირი სამხედრო წარმატება ვერ გადაფარავდა,“ – წერს ინფორმატორი აგენტი, რომელიც საკუთარ თავს „ცვლილებების ქარს“ უწოდებს და გამოთქვამს ვარაუდს, რომ პუტინი ბირთვული იარაღზე მუქარებს დასავლეთის დასაშინებლად იყენებდა.
Newsweek-მა ამავე წერილებში მოთხრობილი სხვა ინფორმაციის შესახებ სტატია ჯერ კიდევ გუშინ გამოაქვეყნა, კერძოდ, გამოცემა წერდა, რომ რუსი ინფორმატორი აგენტის ცნობით, უკრაინაში შეჭრამდე რუსეთი იაპონიაზე თავდასხმას გეგმავდა.
