დიდი ბრიტანეთის დაზვერვის შეფასებით, რუსეთი უკრაინაში მოძველებულ ბირთვულ რაკეტებს იყენებს.
უწყების აზრით, რუსები რაკეტას ბირთვულ ქობინს (რაკეტის საბრძოლო თავი) აცლიან და ისე ისვრიან.
„ღია წყაროებით გავრცელებულ ფოტოებში ჩანს ჩამოგდებული ფრთოსანი რაკეტის ნამსხვრევები, რომლებიც სავარაუდოდ საჰაერო ბაზირების AS-15 KENT-ისაა (რუსული სახელწოდება Радуга Х-55). ეს რაკეტა 1980-იან წლებში შეიქმნა, როგორც ბირთვული მიწოდების სისტემა. მისი ქობინი, სავარაუდოდ, ბალასტით იყო შეცვლილი იყო,“ – წერს დაზვერვა 26 ნოემბრის რელიზში.
უწყების შეფასებით, ნაკლებსავარაუდოა, რომ ასეთი სისტემა ეფექტიანი იქნება განსაზღვრული სამიზნის წინააღმდეგ, თუმცა რაკეტის კინეტიკური ენერგიისა და დაუხარჯავი საწვავის ხარჯზე, მას გარკვეული ზიანის გამოწვევა მაინც შეუძლია.
„როგორც ჩანს, რუსეთს იმედი აქვს, რომ ასეთი რაკეტებს უკრაინის ჰაერსაწინააღმდეგო თავდაცვისთვის სატყუარად გამოიყენებს, თუმცა რა მიზანიც უნდა ამოძრავებდეს რუსეთს, ეს იმპროვიზაცია შორსმოქმედი რაკეტების მწვავე დეფიციტზე მიუთითებს,“ – ასკვნის დაზვერვა.
გაერთიანებული სამეფოს თავდაცვა უკრაინის შესახებ სადაზვერვო ცნობარს ყოველდღიურად აქვეყნებს. გუშინდელ რელიზში უწყება მობილიზაციის პრობლემებზე ამახვილებდა ყურადღებას და აღნიშნავდა, რომ „ნაწილობრივი მობილიზაციის“ გამოცხადებიდან ორი თვის შემდეგ ცხადად გამოიკვეთა ის პრობლემები, რომლებიც მობილიზებულ რეზერვისტთა თითქმის ყველა დანაყოფისთვის საერთოა: მომზადების არაადეკვატური დონე, ცუდი აღჭურვილობა, დაბალი საბრძოლო განწყობა და სამართლებრივი პრობლემები.
________________________-
მთავარ ფოტოზე: ბირთვული რაკეტა AS-15 Kent/ფოტო: Wikipedia
