ნეტგაზეთი • RU

რუსეთმა ქრონიკულად დაავადებული ბევრი რეზერვისტი გაგზავნა ომში – ბრიტანეთის დაზვერვა

დიდი ბრიტანეთის დაზვერვის შეფასებით, „ნაწილობრივი მობილიზაციის“ გამოცხადებიდან ორი თვის შემდეგ ცხადად გამოიკვეთა ის პრობლემები, რომლებიც მობილიზებულ რეზერვისტთა თითქმის ყველა დანაყოფისთვის საერთოა.

უწყების დასკვნით, ფრონტზე მობილიზებულების განლაგება ხშირად დაკავშირებულია სამართლებრივ გაუგებრობებთან, არაადეკვატურია მათი მომზადების დონე და პირადი აღჭურვილობის ხარისხი, დაბალია საბრძოლო განწყობა.

„ყველას არა, მაგრამ მობილიზებულ რეზერვისტთა უმრავლესობას მანამდეც უმსახურია. არაერთი მაგალითი მიუთითებს იმაზე, რომ მობილიზებულთა ჯანმრთელობის მდგომარეობა სათანადოდ არ შემოწმებულა,“ – წერს დაზვერვა 25 ნოემბრის რელიზში და დასძენს, რომ ბრძოლის ველზე რუსეთმა ბევრი ქრონიკული დაავადების მქონე რეზერვისტიც გაგზავნა.

უწყების ცნობით, მობილიზებულთა დანაყოფებს უდიდესი დანაკარგი ჰქონდათ ლუგანსკში, სვატოვოსთან, როდესაც მეთაურობამ ისინი აიძულა, საარტილერიო ცეცხლის ფონზე გაეთხარათ სანგრები. ბევრი რეზერვისტი დაიღუპა ბახმუტთანაც.

„სავარაუდოდ, კრემლი შეშფოთებული იქნება იმ ფაქტითაც, რომ რეზერვისტების ოჯახის წევრები დაპატიმრების რისკის მიუხედავადაც არ წყვეტენ პროტესტს იმ საშინელი პირობების გამო, რომელშიც მათი ოჯახის წევრები მსახურობენ,“ – წერს დაზვერვა.

„ნაწილობრივი მობილიზაცია“, რომელიც ვლადიმერ პუტინმა ჯერ კიდევ სექტემბრის ბოლოს გამოაცხადა, ოფიციალურად დასრულებულია, თუმცა ომის კვლევის ამერიკული ინსტიტუტის (ISW) შეფასებით, კრემლი რეზერვისტების გაწვევას ფარულად განაგრძობს.

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.