ომის კვლევის ამერიკული ინსტიტუტის (ISW) შეფასებით, რეზერვისტთა ოჯახების პროტესტის ფონზე რუსეთის ხელისუფლება მობილიზაციის ახალი ტალღისთვის ემზადება, რუსეთის თავდაცვა კი ცდილობს საინფორმაციო სივრცეში მისდამი კრიტიკა შეამციროს.
ISW-ის დღევანდელი ანგარიშის თემები ომში რუსეთის მრავალმილიარდიანი ხარჯები და რუსეთის ხელისუფლების ახალი დოკუმენტიცაა, რომლის თანახმადაც, მოსკოვს უკრაინაში ომის მოსაგებად 5 მილიონი სამხედროს მობილიზება სჭირდება.
- ცნობები ცუდად აღჭურვილ და მომზადებულ მობილიზებულებზე კიდევ უფრო ამწვავებს დაძაბულობას რუსულ საინფორმაციო სივრცეში.
ინსტიტუტის ანალიტიკოსების ცნობით, მოსკოვის ოლქიდან, სერპუხოვიდან მობილიზებულმა რეზერვისტებმა 23 ნოემბერს განაცხადეს, რომ მეთაურობამ ისინი ფრონტზე სათანადო მომზადების, სამხედრო ფორმების, დამცავი აღჭურვილობის გარეშე გაუშვა და სიკვდილისთვის გაწირა. რეზერვისტები ასევე ამტკიცებდნენ, რომ მათ დღეში მხოლოდ ერთხელ აჭმევენ და ასეთი პირობების გამო ფრონტის წინა ხაზზე სამსახურზე უარს ამბობდნენ.
მაშინ როდესაც რუსი სამხედრო ბლოგერების ნაწილი მობილიზებულების დასჯას მოითხოვდა, „ვაგნერთან“ დაკავშირებულმა ერთ-ერთმა არხმა სერპუხოველი რეზერვისტებისადმი სოლიდარობა გამოხატა და მობილიზაციის პრობლემებზე და რუსული სარდლობის პასუხისმგებლობაზე ალაპარაკდა.
- რუსეთის ხელისუფლება კვლავ უარყოფს მობილიზაციით გამოწვეულ პრობლემებს.
ISW-ი წერს, რომ რუსეთის პრეზიდენტის, ვლადიმერ პუტინის შეხვედრა 18 ქალ პოლიტიკოსთან საზოგადოებას წარუდგინეს, როგორც მობილიზებულების დედებთან დისკუსია. პუტინმა ამ შეხვედრაზე მოსახლეობას მოუწოდა, არ დაუჯერონ ინფორმაციას მობილიზებულთა პრობლემებზე და ილაპარაკა იმის შესახებ, თუ როგორ უმჯობესდება რეზერვისტთა პირობები.
საჩვენებელი შეხვედრის პარალელურად, მობილიზებულთა ოჯახის წევრები პროტესტს განაგრძობენ. ერთ-ერთი რუსული არხის მიერ გავრცელებულ ვიდეოში ჩანს ქალი, რომელიც მარტში დაკარგულ ჯარისკაც შვილს ეძებს და ამბობს, რომ ხელისუფლების წარმომადგენლები მასთან შეხვედრაზე უარს ამბობენ.
- ომის ხარჯები მძიმედ აწევს რუსეთის ეკონომიკას და ეს ხარჯები მობილიზაციამ კიდევ უფრო გაზარდა.
ინსტიტუტის ანალიტიკოსები ეყრდნობიან Forbes-ის გამოძიებას, რომლის თანახმადაც, რუსეთმა ცხრა თვეში ომზე $82 მილიარდი დოლარი დახარჯა – 2021 წლის ქვეყნის ბიუჯეტის, $340 მილიარდის, მეოთხედი.
გამოცემის გათვლებით, 300 000 მობილიზებულის უზრუნველყოფა სახელმწიფოს დამატებით თვეში $2.7 მილიარდი უჯდება
- რუსეთის თავდაცვამ მოუხშირა სამხედრო ტყვეების გაცვლას, სავარაუდოდ, იმ მიზეზით, რომ მისდამი კრიტიკა შეამციროს.
რუსული და უკრაინული წყაროების თანახმად 23, 24 და 25 ნოემბერს ტყვეთა სამი გაცვლა შედგა.
23 ნოემბერს 35 რუსი ტყვე 35 უკრაინელ ტყვეში გაცვალეს, 24 ნოემბერს – 50 – 50-ში, 25 ნოემბერს კი უკრაინამ და რუსეთმა 9-9 ტყვე დაიბრუნეს.
ISW-ის ექსპერტები ხაზს უსვამენ, რომ ბოლო პერიოდში, რუსეთის თავდაცვას სხვა საკითხებთან ერთად აკრიტიკებდნენ იმის გამოც, რომ ის სათანადოდ არ ზრუნავს ტყვედ ჩავარდნილ რუს სამხედროებზე.
- უკრაინის ძალებმა ოქტომბერში მოკლეს ოკუპირებულ ყირიმში მყოფი ირანელი სამხედრო მრჩეველი და განაცხადეს, რომ უკრაინა დაარტყამს ნებისმიერ ირანულ სამხედრო ობიექტს უკრაინის ტერიტორიაზე.
ინფორმაცია The Guardian-თან ინტერვიუში 24 ნოემბერს უკრაინის ეროვნული უსაფრთხოებისა და თავდაცვის საბჭოს მდივანმა ოლექსი დანილოვმა დაადასტურა.
დანილოვს არ დაუზუსტებია, სულ რამდენი ირანელი მრჩეველი მოკლეს უკრაინის ძალებმა, თუმცა 10 ოქტომბერს გამოცემა Jerusalem Post-მა დაწერა, რომ უკრაინაში 10 ირანელი სამხედროა მოკლული.
უკრაინაში ირანელი სამხედროების ყოფნა ჯერ კიდევ 20 ოქტომბერს შეერთებული შტატების უსაფრთხოების საბჭოს პრესსპიკერმა ჯონ კირბიმაც დაადასტურა. მისი თქმით, ირანელი ინსტრუქტორები ოკუპირებულ ყირიმში იმყოფებიან და რუს სამხედროებს ირანული წარმოების დრონების გამოყენებაში ეხმარებიან.
ოლექსი დანილოვის თქმით, უკრაინის არმია მიზანში ამოიღებს ნებისმიერ ირანულ სამხედროს ან ობიექტს უკრაინის ტერიტორიაზე.
ISW-ის შეფასებით, ეს დადასტურება და მუქარა, სავარაუდოდ, ვერ გადააფიქრებინებს ირანს, რუსეთის მხარდაჭერა გააგრძელოს.
- რუსეთის ხელისუფლების წარმომადგენლები, შესაძლოა, რუს ჩინოვნიკებში ავრცელებდნენ დოკუმენტს, რომლის თანახმადაც რუსეთს უკრაინაში ომის მოსაგებად 5 მილიონი სამხედროს მობილიზება სჭირდება.
უკრაინის გენშტაბის უფროსის მოადგილემ ოლექსი გრომოვმა განაცხადა, რომ რუსეთის სამხედრო-პოლიტიკურმა ხელმძღვანელობამ შექმნა დოკუმენტი სახელწოდებით „უკრაინაში NATO-სთან ომის დასასრული“ და მისი გავრცელება დაიწყო.
დოკუმენტის თანახმად, რუსეთს ომში გამარჯვებისთვის დამატებით 5 მილიონი სამხედროს მობილიზება სჭირდება.
„უცნობია, რუსეთის სარდლობა ამ 5 მილიონს განიხილავს როგორც შესაძლო მიზანს, თუ ეს არის მიუღწეველი და სასურველი რიცხვი, რაც მიუთითებს, რომ მოსკოვს დღეს არ შეუძლია უკრაინაში საკუთარი მიზნების მიღწევა. რუსეთის ქაოსური და არაეფექტიანი „ნაწილობრივი მობილიზაცია“, რომლის მიზანიც 300 000 რეზერვისთვის გაწვევა იყო, ადასტურებს, რომ 5 მილიონი ადამიანის მობილიზება რუსეთისთვის შეუსრულებელი ამოცანაა,“ – წერს ISW.
ISW–ის ანგარიშის სხვა მთავარი მიგნებები:
- რუსეთის ძალებმა შეზღუდული შეტევები განახორციელეს სვატოვოს ჩრდილო-აღმოსავლეთით დაკარგული პოზიციების დასაბრუნებლად;
- რუსული წყაროების თანახმად, უკრაინის არმია განაგრძობდა კონტრშეტევას კრემენაიას მიმართულებით;
- რუსეთის ძალები განაგრძობდნენ შეტევას ბახმუტისა და ავდეევკის რაიონში;
- რუსეთის არმია ასევე განაგრძობდა თავდაცვის ხაზის გამაგრებას მდინარე დნეპრის სამხრეთით, ხერსონის ოლქში;
- რუსული წყაროების და ხელისუფლების წარმომადგენლები ამზადებენ საინფორმაციო სივრცეს მობილიზაციის ახალი ტალღისთვის.
