ხარკოვის მერი იგორ ტერეხოვი 3400 გრივნით ($90) დააჯარიმეს იმის გამო, რომ ტელემარათონის ეთერით მან ხარკოველებს არა უკრაინულად, არამედ რუსულად მიმართა.
გადაწყვეტილება მერის დაჯარიმების შესახებ ენის ომბუდსმენმა ტარას კრემინმა მიიღო. როგორც მისი ოფისის ოფიციალურ ფეისბუქგვერდზე გამოქვეყნებულ განცხადებაშია ნათქვამი, ხარკოვის მერმა სახელმწიფო ენის შესახებ კანონი დაარღვია, როდესაც ტელემარათონის ეთერში არასახელმწიფო ენაზე ილაპარაკა.
„ხარკოვის მერიას ასევე მიეცა გაფრთხილება სახელმწიფო ენის შესახებ კანონის დარღვევის გამო. კანონის თანახმად, ხარკოვის მერის ოფიციალური საიტი, ფეისბუქისა და ტელეგრამის არხები უნდა იმართებოდეს სახელმწიფო ენაზე,“ – წერს ენის ომბუდსმენის ოფისი.
იგორ ტერეხოვს ამ გადაწყვეტილების გასაჩივრების ვადა 4 დეკემბრამდე აქვს.
როგორც ადგილობრივი მედია წერს, კრემინმა ხარკოვის მერი ჯერ კიდევ ოქტომბერში გააფრთხილა, რომ 2022 წლის 16 ივლისიდან ძალაში შევიდა ენის კანონის ახალი ნორმები, რომელთა თანახმადაც სახელმწიფო ჩინოვნიკებს საჯარო გამოსვლებისას სახელმწიფო ენაზე ლაპარაკი ევალებათ.
