რუსეთმა 2023 წლის სექტემბრიდან სკოლებში სამხედრო სწავლების დაბრუნების შესახებ გამოაცხადა. ბრიტანეთის თავდაცვის სამინისტროს განმარტებით, კრემლი უბრუნდება საბჭოთა პერიოდის პროგრამას.
შესაბამისი ინფორმაცია ბრიტანეთის დაზვერვამ დღეს, 13 ნოემბერს, გამოაქვეყნა. მათ ასევე განმარტეს, რომ ეს უკავშირდება უკრაინაში რუსეთის მიერ დაწყებულ ომს.
ბრიტანელები განმარტავენ, თუ რა ტიპის სამხედრო სწავლებას გეგმავს რუსეთი მოზარდებთან.
ეს არის საბჭოთა პერიოდის პროგრამის გამეორება, როდესაც მოსწავლეები სკოლებში სწავლობდნენ სავალდებულო სამხედრო მომზადებას. ეს პროგრამა 1993 წელს დასრულდა – იუწყება დიდი ბრიტანეთის თავდაცვის სამინისტრო.
მათივე განმარტებით, საბჭოთა პერიოდში ეს სწავლება ითვალისწინებდა იმას, თუ როგორ უნდა ემოქმედა მოზარდს საგანგებო სიტუაციაში.
რუსეთს ამ სწავლების განახლება ჯერ კიდევ 2014 წელს, მას შემდეგ სურდა, როდესაც ყირიმში შეიჭრა და მისი ოკუპაცია მოახდინა – აცხადებს დიდი ბრიტანეთის დაზვერვა.
მათი მონაცემებით, რუსეთი ამ იდეით ებღაუჭება იმედს, რომ ინიციატივა გააუმჯობესებს წვევამდელების მომზადების ხარისხს. თუმცა 8 წლის განმავლობაში ცოტა რამე თუ შეიცვალა:
რუსი წვევამდელების მომზადების ხარისხი ისევ დაბალია და დაბალია მორალურადაც.
რუსეთი ჯერჯერობით ამუშავებს სასწავლო პროგრამას, რომლის დასრულებაც 2022 წლის ბოლომდე იგეგმება. ამის შემდეგ ის გაივლის დამტკიცების პროცესს.
აგრესორი ქვეყნის თავდაცვის სამინისტრო მხარს უჭერს ამ პროცესს და მიიჩნევს, რომ სასწავლო წლის განმავლობაში ამ საგანს მინიმუმ 140 საათი უნდა დაეთმოს.
ბრიტანეთის დაზვერვის განმარტებით, სავარაუდოდ, ამ სწავლების მიზანია, მოამზადოს მოზარდები სამხედრო უნარებში, რადგან ისინი უახლოვდებიან არმიაში გაწვევის ასაკს, ასევე გაზარდოს სამობილიზაციო თუ გასაწვევ პირთა რაოდენობა.
ბრიტანეთის თავდაცვის სამინისტროს მონაცემებით, ეს ინიციატივა შეიძლება იყოს უფრო ფართო პროექტის ნაწილი: დანერგონ რუს მოსახლეობაში „პატრიოტიზმი“ და ასევე „ნდობა“ სახელმწიფო ინსტიტუტების მიმართ.
