გერმანიამ უკრაინას სამხედრო ტექნიკისა და იარაღის კიდევ ერთი პარტია გაუგზავნა. გუშინ, 9 ნოემბერს, გერმანიის მთავრობის ვებგვერდზე გამოქვეყნებული ინფორმაციის თანახმად, კიევი მიიღებს 30 ჯავშანტრანსპორტიორ Dingo-ს, IRIS-T SLM-ის საჰაერო თავდაცვის რაკეტებს, 18 სადაზვერვო უპილოტო აპარატს, 18 დრონის დასაცავ აღჭურვილობას, 5 M1070 Oshkosh ტანკს და 3 სატვირთო მანქანას.
„დოიჩე ველეს“ ცნობით, გერმანია უკრაინას აწვდის იარაღს და აღჭურვილობას ბუნდესვერის მარაგებიდან, რომლებიც ფინანსდება უცხოელი პარტნიორების უსაფრთხოების უზრუნველყოფის დახმარების ინიციატივის – Ertüchtigungsinitiative-ის ფარგლებში.
Ertüchtigungsinitiative-ს ერთობლივად მართავს გერმანიის ორი ფედერალური სამინისტრო: თავდაცვისა და საგარეო საქმეთა. იგი შექმნილია უცხოელი პარტნიორებისა და ორგანიზაციების მხარდასაჭერად კონფლიქტების პრევენციასა და შეკავებაში. 2022 წელს ბერლინმა გააფართოვა ეს დახმარების ფონდი 2 მილიარდ ევრომდე, თანხის უმეტესი ნაწილი მიმართულია უკრაინის სამხედრო დახმარებაზე – წერს გამოცემა.
გერმანია ასევე კიევს აწვდის თვითმავალ საზენიტო იარაღს Gepard-ს, თვითმავალ საარტილერიო იარაღს – Panzerhaubitze 2000-ს, MARS II-ის მრავალჯერად სარაკეტო სისტემებს, Stinger-ის პორტატიულ საზენიტო-სარაკეტო სისტემებს და ხელის ტანკსაწინააღმდეგო ყუმბარმტყორცნებს.
ოქტომბერში გერმანიის მმართველი კოალიციის შემადგენლობაში მყოფმა „მწვანეთა პარტიის“ წარმომადგენლებმა მხარი დაუჭირეს უკრაინისათვის იარაღის მიწოდების გაზრდას. განცხადება მიღებულ იქნა 15 ოქტომბერს, ქალაქ ბონში გამართულ პარტიულ კონგრესზე. პარტიის თანათავმჯდომარემ ომიდ ნურიპურმა განაცხადა, რომ „ეს იარაღი სიცოცხლეს იხსნის“, ნოემბერში კი მოუწოდეს ბუნდესტაგს, მხარი დაუჭიროს უკრაინის შეიარაღებული ძალების კონტრშეტევას იარაღით.
_______________
ფოტოზე: IRIS-T SLM. ფოტო: „დოიჩე ველე“
