უკრაინის კონტრდაზვერვამ გააუვნებლა დივერსანტთა ჯგუფი, რომელიც გამოძიების მტკიცებით, უკრაინის სპეცდანიშნულების ძალების მეთაურთა ლიკვიდაციას გეგმავდა.
როგორც უშიშროების საიტზე გამოქვეყნებულ ინფორმაციაშია ნათქვამი, ФСБ -ს ჯგუფის წევრების დასაკავებლად ოპერაცია ერთდროულად კიევისა და სუმის ოლქებში მიმდინარეობდა.
უშიშროების ცნობით, ჯგუფის წევრები ზვერავდნენ უკრაინის ძალების გადაადგილებას დედაქალაქში და ჩრდილო-აღმოსავლეთ რაიონებში, აგროვებდნენ სპეციალური ძალების მეთაურთა პერსონალურ ინფორმაციას და ცნობებს მათი გადაადგილების მარშრუტების შესახებ.
„მიღებული ინფორმაციის გამოყენებას აგრესორი გეგმავდა უკრაინის დამცველების ფიზიკური ლიკვიდაციისთვის, მათი შეიარაღებისა და სამხედრო ტექნიკის გასანადგურებლად,“ – აღნიშნავს უშიშროება.
გამოძიების ცნობით, დივერსანტთა ჯგუფი ФСБ-ს თანამშრომელმა შექმნა. ჯგუფის ერთ-ერთი წევრი იყო სუმის ოლქის მცხოვრები, რომელიც რუსეთის სპეცსამსახურებმა სრულმასშტაბიანი ომის დაწყების შემდეგ გადაიბირეს.
„სწორედ ის იყო პირდაპირ კავშირზე თავის „კურატორთან“ და მასთან ათანხმებდა გეგმებს და მოქმედებებს. კომუნიკაციისთვის ისინი ელექტრონული კავშირის დახურულ არხებს იყენებდნენ. ФСБ-ს ბრძანებით, ამ აგენტმა დანაშაულებრივ საქმიანობაში ჩართო კიდევ ერთი ადგილობრივი მცხოვრები,“ – ნათქვამია უშიშროების სამსახურის განცხადებაში.
გამოძიების მტკიცებით, ჯგუფის ერთ-ერთი წევრი იმყოფებოდა კიევშიც, სადაც აწარმოებდა უკრაინის დამცველების ლოკაციების ფოტო და ვიდეოგადაღებას, რათა ეს მასალები შემდეგ რუსეთის სპეცსამსახურებისთვის გადაეცა.
უშიშროების ცნობით, დივერსანტები მაშინ დააკავეს, როდესაც ისინი წინასწარ მოწყობილი სამალავიდან იარაღს იღებდნენ.
დაკავებულებს სახელმწიფოს ღალატი წაუყენეს ბრალად.
მთავარ ფოტო: არტემ დიხტიარენკო, უკრაინის უშიშროება
