ნეტგაზეთი • RU

ბათუმის საკრებულოს წევრმა ნინო ცხვარაძემ „ოცნება“ დატოვა

დღეს, 31 ოქტომბერს, ბათუმის საკრებულოს წევრმა „ქართული ოცნებიდან“, ნინო ცხვარაძემ, რომელიც ფრაქცია ,,ქართული ოცნება – დემოკრატიული საქართველოს” თავმჯდომარის მოადგილე იყო, „ოცნება“ დატოვა.

ნინო ცხვარაძე „ხალხის ძალას“ შეუერთდა, რომელიც „ქართული ოცნებიდან“ წასულმა დეპუტატებმა: სოზარ სუბარმა, დიმიტრი ხუნდაძემ, მიხეილ ყაველაშვილმა და გურამ მაჭარაშვილმა დააარსეს.

„ვტოვებ ქართულ ოცნებას, ვუერთდები ხალხის ძალას, შესაბამისად ვტოვებ ფრაქციის მოადგილის პოსტს.

გადაწყვეტილება მივიღე იქიდან გამომდინარე, რომ შემიძლია უფრო ხმამაღლა და უფრო დეტალურად ვესაუბრო მოსახლეობას იმ საფრთხეებზე და გამოწვევებზე, რაც ჩვენი ქვეყნის წინაშე დგას“ – აღნიშნა ნინო ცხვარაძემ ჟურნალისტებთან.

თავდაპირველად „ქართული ოცნება“ „კულისებიდან პოლიტიკური ფაქტებისა და მოვლენების შესახებ მეტი ინფორმაციის“ გატანის მიზეზით დატოვეს პარლამენტის დეპუტატებმა: სოზარ სუბარმა, მიხეილ ყაველაშვილმა და დიმიტრი ხუნდაძემ. მათ გაააქტიურეს „ოცნების“ მიერ წამოწყებული ანტიდასავლური პროპაგანდა, რომ თითქოს საქართველო მეორე ფრონტის გახსნაზე უარის თქმის გამო ისჯება და ამიტომ ევროკავშირის წევრობის კანდიდატის სტატუსი, უკრაინისა და მოლდოვისგან განსხვავებით, ვერ მიიღო.

პარლამენტის დეპუტატების კვალდაკვალ მმართველი პარტიის დატოვება დაიწყეს საკრებულოებში წარმოდგენილმა „ქართული ოცნების“ წევრებმაც. მოგვიანებით მათ შეუერთდა პარლამენტის წევრი გურამ მაჭარაშვილი და საზოგადოებრივი მოძრაობა „ხალხის ძალა“ დააფუძნეს, რომლის მიზნადაც დაასახელეს „საზოგადოების სიმართლით აღჭურვა“.

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.