ცენტრალურმა საარჩევნო კომისიამ [ცესკო] სხდომათა დარბაზის მოსაწყობად ტენდერი გამოაცხადა. შესყიდვის სავარაუდო ღირებულება 2 252 600 ლარია.
ტენდერს თან ახლავს პროექტი, რომლის მიხედვითაც სხდომათა დარბაზი ცესკოს შენობის იმ ღია ფლიგელში მოეწყობა, რომელსაც დღეს ავტოსადგომად იყენებენ.
ცესკოს სხდომათა დარბაზი – არსებული სიტუაცია და რენდერი / ფოტოები პროექტიდან
პროექტის განმარტებითი ბარათის მიხედვით:
- „საპროექტო ობიექტი მდებარეობს თბილისში, დ.აღმაშენებლის ხეივნის მიმდებარე ტერიტორიაზე.
- დამკვეთის სურვილისამებრ იგეგმება არსებული შენობის მარცხენა ნაწილის რეკონსტრუქცია, საარჩევნო ადმინისტრაციის სხდომის დარბაზის მოწყობის მიზნით.
- არსებული ფლიგელი არის ბეტონის ანაკრები კონსტრუქცია ორქანობიანი გადახურვით. მას არ გააჩნია შემავსებელი კედლები და ტიხრები. დღეის მდგომარეობით გამოიყენება დროებით ავტოსადგომად.
- საპროექტო დავალების მიხედვით უნდა განხორციელდეს აღნიშნული სივრცის რეკონსტრუქცია და როგორც უკვე აღინიშნა უნდა მოეწყოს სხდომის დარბაზი.
- დაგეგმარებისას მოხდა სივრცის ფუნქციური ზონირება: სივრცე გაიყო პირობითად სამ ზონად: ფოიე/რესეფშენი, სველი წერტილების ზონა და უშუალოდ დარბაზი.
- რესეფშენის ზონა მოიცავს მომსვლელთა და სტუმართა მიღებას, მათ დროებით განთავსებას. სველი წერტილების დაპროექტებისას მოეწყო ქალთა და მამაკაცთა ცალ-ცალკე ზონები და აგრეთვე შშმ პირთათვის ადაპტირებული საპირფარეშო.
- დარბაზი პირობითად დაყოფილია ოთხ ნაწილად: სცენა, სადაც განთავსებულია საარჩევნო საბჭოს თავმჯდომარისა და წევრების ადგილი, პირველი რიგი ადმინისტრაციის თანამშრომლებისათვის, მესამე ნაწილში მოწყობილია სკამები დამსწრე საზოგადოებისათვის, ხოლო მეოთხე ზონა განეკუთვნება ჟურნალისტებს, მართვის ოთახსა და სინქრონული თარგმანის კაბინებს.
- დავალება მოიცავდა ექსტერიერის რეკონსტრუქციასა და ინტერიერის დაპროექტებას. მოწყობილია მოსასვენებელი სივრცე, გამწვანებით და დეკორატიული ელემენტებით…
- სკამები და სხვა ფურნიტურე წარმოდგენილია ვიზუალურ ნაწილში. დეტალები და რიგი საკითხები დაზუსტდეს დამკვეთთან.“
ტენდერში წინადადებების მიღება 2022 წლის 16 ნოემბერს დაიწყება და 21 ნოემბერს დასრულდება. ახალი სხდომათა დარბაზი 2023 წლის დეკემბრამდე უნდა მოეწყოს.
ტენდერის პირობის მიხედვით:
- „შესრულებული სამუშაოს საგარანტიო ვადა შეადგენს მიღება-ჩაბარების აქტის გაფორმებიდან 3 წელს.
- მიმწოდებელი ვალდებულია მოწყობილობებზე/დანადგარებზე წარმოადგინოს მწარმოებლის მიერ გაცემული საგარანტიო პირობები/ვადები.
- სამუშაოების დასრულების შემდეგ, საგარანტიო ვადის განმავლობაში უხარისხო ან/და არაჯეროვანი შესრულებით გამოწვეული რაიმე წუნის/ნაკლოვანებების/დეფექტების აღმოჩენის შემთხვევაში, მიმწოდებელი ვალდებულია აღმოფხვრას უხარისხოდ შესრულებული სამუშაოები საკუთარი ხარჯებით შეტყობინების მიღებიდან 10 დღის ვადაში.“
