დიდი ბრიტანეთის დაზვერვა ხერსონიდან „ევაკუაციას” და მე-18 საუკუნის რუსი მხედარმთავრის, გრიგორი პოტიომკინის ნეშტის წაღებას ეხმაურება.
27 ოქტომბერს რუსეთის დანიშნულმა გუბერნატორმა ოკუპირებულ ხერსონში, ვლადიმირ სალდომ, თქვა, რომ უკვე 70 000-ზე მეტმა ადამიანმა დატოვა ქალაქი ხერსონი.
მანამდე, 26 ოქტომბერს სალდომ განაცხადა, რომ რუსეთმა ხერსონის კათედრალიდან გაიტანა მე-18 საუკუნის ცნობილი რუსი სამხედრო მეთაურისა და იმპერატორ ეკატერინე მეორის საყვარლის, კნიაზ გრიგორი პოტიომკინის ნეშტი.
„რუსულ ეროვნულ იდენტობაში პოტიომკინი მჭიდროდაა დაკავშირებული მე-18 საუკუნეში რუსეთის მიერ უკრაინული მიწების დაპყრობასთან და ხაზს უსვამს იმ მნიშვნელობას, რომელსაც პუტინი ომის მის მიერ წარმოდგენილ ისტორიულ გამართლებას ანიჭებს,“ – წერს დაზვერვა 29 ოქტომბრის რელიზში.
უწყების შეფასებით, პოტიომკინის ძვლების სიმბოლური გატანა და მოქალაქეების მასობრივი გასვლა, სავარაუდოდ, მიუთითებს რუსეთის განზრახვაზე, რეგიონიდან უკან დახევა დააჩქაროს.
ხერსონის ეკატერინეს სახელობის ტაძრიდან გრიგორი პოტიომკინის ნეშტის გატანაზე ვრცელი სტატია გუშინ The New York Times-მა გამოაქვეყნა.
„მე-19 საუკუნის დამპყრობლის ხსოვნა ახლაც ცოცხალია კრემლში მათთვის, ვინც რუსეთის იმპერიის აღდგენას ცდილობს,“ – წერდა გამოცემა და დასძენდა, რომ პუტინი პოტიომკინის ხედვას მიჰყვება, რადგან სწორედ პოტიომკინმა დაარწმუნა ეკატერინე, 1783 წელს ყირიმი დაეპყრო და სწორედ ის იყო „ნოვოროსიის“ (ახალი რუსეთი), უკრაინის სამხრეთში შექმნილი ხელოვნური ადმინისტრაციული ერთეულის ავტორი.
The New York Time-ს ასევე აღნიშნავდა, რომ რუსებმა ხერსონიდან მოხსნეს და გაიტანეს პოტიომკინისა და სხვა რუსი მხედართმთავრების ძეგლებიც.
