ნეტგაზეთი • RU

22 წლის მარტოხელა დედას სმენის აპარატი სჭირდება, რომ სწავლა გააგრძელოს

22 წლის ეკატერინე ნოდიას სმენის აპარატი სჭირდება. მას 11 წლის ასაკში სმენა დაუქვეითდა და აპარატის გარეშე აღარ ესმის. ეკატერინე სტუდენტია, გასულ წელს ჩაირიცხა ქუთაისის სახელმწიფო უნივერსიტეტში, თუმცა ლექციებს სრულფასოვნად ვერ უსმენს. არ გამოადგა აპარატი, რომელიც სახელმწიფო პროგრამით გადაეცა.

ეკატერინე სოციალურად დაუცველია და მარტოხელა დედაა. სამტრედიაში ქირით ცხოვრობს და ქუთაისში, უნივერსიტეტში სამტრედიიდან დადის.

„ბოლო კვირაა საერთოდ არ წავსულვარ, რადგან იმ აპარატით, რომელიც სახელმწიფო პროგრამით გადმომცეს, ვერ ვსარგებლობ. აპარატი შიშინებს და ხმებს საერთოდ ვერ ვარჩევ. არაერთხელ ვცადე აპარატის გასწორება, მაგრამ ხმა მაინც არ ისმის.

კარგი ხარისხის აპარატი 8 ათასი ლარი ღირს, თუმცა გამოჩნდა ერთი ადამიანი, რომელიც მეორად აპარატს ყიდის და სადღაც 3 500 ლარი ღირს.

ჩემს მეგობრებს ჩემზე რთული დაქვეითება აქვთ სმენის, თუმცა ხარისხიან აპარატებში არ უჭირთ მოსმენა.

ახლა, როცა სტუდენტი გავხდი და ძალიან მინდა სწავლის გაგრძელება, ლექციების მოსმენა, სმენის აპარატი ძალიან მნიშვნელოვანია ჩემთვის“, – გვეუბნება ეკატერინე.

ეკატერინემ საზოგადოებას დახმარების თხოვნითაც მიმართა, თუმცა საკმარისი თანხა ჯერ ვერ შეაგროვა. „მსახიობმა ია ფარულავამ დამიდო პოსტი ფეისბუკზე და ამის შემდეგ დამერიცხა 1000 ლარი, დამეხმარა ხალხი და ეს თანხა მაქვს ამჟამად ანგარიშზე. თუ გამოიჩენენ კიდევ გულისხმიერებას ადამიანები, იქნებ შემიგროვდეს აპარატის შესაძენი თანხა“, – ამბობს ეკატერინე.

ამ ეტაპზე მას ლექციების მოსმენა არ შეუძლია, ამიტომ სასწავლო პროგრამას წიგნებიდან, დამოუკიდებლად ამზადებს. გამოცდებს და სემინარებს კი წერილობით აბარებს.

„სახელმწიფო ამ ეტაპზე სხვას ვერაფერს მთავაზობს, ფინანსურ დახმარებაზეც უარი მითხრეს, რომ ჩემით შევიძინო აპარატი. მე კი სოციალური შემწეობის გარდა სხვა შემოსავალი არ მაქვს. გარდა ამისა, 6 წლის შვილი მყავს, რომელზე ზრუნვაც მარტოს მიწევს“, – ამბობს ეკატერინე.

ეკატერინე 11 წლის ასაკში მძიმე ინფექციას ებრძოდა. მისი თქმით, ანტიბიოტიკების მაღალი დოზის გამოყენებამ გავლენა იქონია მის სმენაზე და შემდგომ წლებში სმენა კიდევ უფრო დაუქვეითდა.

__________________

ეკატერინე ნოდიას დახმარების სურვილის შემთხვევაში, შეგიძლიათ თანხა ჩარიცხოთ მის პირად ანგარიშზე:

საქართველოს ბანკი: GE06BG0000000528146981

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com