გერმანული ავტოკონცერნი Mercedes-Benz-ი რუსეთის ბაზრიდან გადის, პოდმოსკოვიეში ქარხანას და ქონებას ყიდის.
ამის შესახებ საერთაშორისო მედია და რუსული წყაროები კომპანიის ოფიციალურ განცხადებაზე დაყრდნობით წერენ.
„Mercedes-Benz-ი აპირებს დატოვოს რუსეთის ბაზარი და თავისი წილი ადგილობრივ შვილობილ კომპანიებში ადგილობრივ ინვესტორებს მიჰყიდოს“, – ნათქვამია ავტოკონცერნის განცხადებაში.
რუსული წყაროების ცნობით, გერმანული კომპანიის აქტივებს მიიღებს კომპანია Автодом-ი, რომელიც სპეციალიზებულია პრემიუმკლასის ავტომობილების გაყიდვასა და მომსახურებაზე.
Mercedes – ავტომობილების მწარმოებელი პირველი კომპანია არაა, რომელიც რუსეთიდან გადის. მანამდე თავისი აქტივები გაყიდეს და რუსული ბაზარი დატოვეს Renault-მ და Nissan-მა, ასევე ქვეყანაში დაიხურა Toyota-ს ქარხანა.
Mercedes-ის აქტივები რუსეთში 2021 წლის ბოლოს 2 მილიარდ ევროდ იყო შეფასებული. კომპანიის ქარხანა, რომელიც წელიწადში 25 ათას ავტომობილს უშვებდა, პადმოსკოვიეში 2019 წელს გაიხსნა.
2022 წლის ათი თვის მონაცემებით, Mercedes-Benz-ის ავტომოილების გაყიდვები რუსეთის ფედერაციაში 73%-ითაა შემცირებული.
