საქართველოს შინაგან საქმეთა სამინისტრო 800 ათასამდე ლარს დახარჯავს ბათუმში, ტბელ აბუსერიძის ქუჩაზე მდებარე აჭარის პოლიციის დეპარტამენტის ერთ-ერთი შენობის გასარემონტებლად.
გასულ წელს კი, საუბარი იყო იმაზე, რომ პოლიციის ახალი ადმინისტრაციული შენობის მშენებლობა ბარცხანაში დაიწყებოდა, რისთვისაც ბათუმის მუნიციპალიტეტმა ოდისეი დიმიტრიადის ქუჩის 17 ნომერში [ბარცხანის ხიდთან, ზღვის მხარეს] 15 938 კვ.მ მიწის ნაკვეთი საკუთრებაში გადასცა სახელმწიფოს.
ნაკვეთი ბათუმში, რომელიც შსს-ს სარგებლობაშია / ოდისეი დიმიტრიადის ქუჩა 17
პირობის მიხედვით, სანაცვლოდ სახელმწიფოს ბათუმისთვის საკუთრებაში უნდა გადმოეცა ტბელ აბუსერიძის ქუჩა 11ა-ში მდებარე ქონება [მიწა და შენობები], რომლებსაც დღეს შსს სარგებლობს.
აჭარის პოლიციის დეპარტამენტის სარემონტო შენობა ტბელ აბუსერიძის ქუჩა 11ა-ში
მერიაში „ბათუმელებს“ უთხრეს, რომ აბუსერიძის ქუჩაზე მდებარე ქონება ქალაქს საკუთრებაში მას შემდეგ გადაეცემა, რაც შსს ახალ შენობას ააშენებს ბარცხანაში: „ეს თავიდანვე ასე იყო ჩადებული პირობაში. ვინაიდან პოლიცია დღემდე ფუნქციონირებს აბუსერიძის ქუჩაზე, ამიტომ აქ არსებული უძრავი ქონება ჯერ არ გადმოსულა ბათუმის მუნიციპალიტეტის საკუთრებაში“.
დაახლოებით როდისთვის გეგმავს სამინისტრო ბარცხანაში ახალი ადმინისტრაციული შენობის მშენებლობის დაწყებას – აღნიშნულ საკითხზე „ბათუმელებმა“ შსს-დან კომენტარი ამ დრომდე ვერ მიიღო.
ბათუმში, ტბელ აბუსერიძის ქუჩა N11ა-ში მდებარე ერთ-ერთი, ხუთსართულიანი შენობის სარემონტო სამუშაოების შესყიდვაზე კი, შსს-მ ტენდერი 799 600 ლარით გამოაცხადა.
ტენდერში წინადადებების მიღება 2022 წლის 20 ნოემბერს დაიწყება და 25 ნოემბერს დასრულდება.
სარემონტო სამუშაოების შესრულების ვადა კი, ხელშეკრულების გაფორმებიდან 240 დღე, ანუ 8 თვეა.
აქვე აღსანიშნავია, რომ შსს ორ კორპუსს ბათუმში პოლიციელებისთვისაც აშენებს, რომლებსაც ბინები 2020 წელს უნდა მიეღოთ, თუმცა, სამუშაოების დაწყებიდან 4 წლის შემდეგ, ეს შენობები დაუმთავრებელია და მომავალმა მესაკუთრეებმა კვლავ არ იციან, როდის მოახერხებენ ახალ კორპუსში შესახლებას.
ამავე თემაზე:
აჭარის პოლიციის შენობის ადგილას ცათამბჯენები აშენდება? – დეპარტამენტი ბარცხანაში გადადის
