ჩერკასის მცხოვრებს, 62 წლის ტატიანა დრობოტს, რომელიც რუსებს უკრაინის შეიარაღებული ძალების ობიექტებისა და პოზიციების ფოტოებს უგზავნიდა, სამშობლოს ღალატისთვის სასამართლომ 10 წელი მიუსაჯა.
ჩერკასის საოლქო პროკურატურის ინფორმაციით, გამომძიებლებმა მსჯავრდებულის სახლის ჩხრეკისას აღმოაჩინეს მტკიცებულებები, რომლებიც უკრაინის არმიის დანაყოფების ადგილმდებარეობის შესახებ ინფორმაციის რუსეთის მოქალაქეებისთვის გადაცემას ადასტურებდა.
გამოძიების მტკიცებით, მსჯავრდებული ერთ-ერთ სოციალურ ქსელში ასევე ღიად უჭერდა მხარს რუსეთის სამხედრო აგრესიას უკრაინაში და რუსეთის ფედერაციას ჩერკასის კონკრეტულ მიკრორაიონზე საარტილერიო და სარაკეტო დარტყმისკენ მოუწოდებდა. იმ რაიონში უკრაინის არმიის სამხედრო ობიექტი მდებარეობს.
ტატიანა დრობოტი მარტში დააკავეს. გამოძიების ცნობით, მან რუსულ ნომრებზე გაგზავნა ფოტოები, რომლებიც მისმა ქმარმა პლანშეტით გადაიღო. სამართალდამცველების თქმით, მარტში უკრაინის კანონმდებლობა ჯერ კიდევ არ ითვალისწინებდა სასჯელს სამხედრო ობიექტების ფოტოგრაფირებისთვის, ამიტომაც ქალის ქმარი მაშინ დაკავებას გადაურჩა, თუმცა ის აპრილში მაინც დააკავეს და საბრძოლო მასალების უკანონოდ ფლობისა და შენახვისთვის გაასამართლეს.
მსჯავრდებულმა სასამართლოზე დანაშაული აღიარა და აღნიშნა, რომ ემოციებით ხელმძღვანელობდა და უკრაინის ან უკრაინის მოქალაქეებისთვის ზიანის მიყენება არ სურდა.
ტატიანა დრობოტის ადვოკატის თქმით, ქალის ერთ-ერთი შვილი უკრაინის შეიარაღებული ძალების სამხედროა და რუსეთის წინააღმდეგ ომში იბრძვის.
მთავარი ფოტო: ტატიანა დრობოტის სასამართლო პროცესი/ფოტო: 1800.com.ua
___
მსგავსი თემა:
„თქვენ ნაძირლებო“, – უკრაინელი ჯარისკაცის მესიჯი მამას, რომელიც რუსების მხარეს იბრძვის
