10 ოქტომბერს რუსეთმა უკრაინაში 84 ფრთოსანი რაკეტა და 24 დრონი გაუშვა – Forbes-ის დათვლით, მათი საშუალო საერთო ღირებულება 400-700 მილიონი დოლარია.
Forbes-ი აღნიშნავს, რომ უკრაინაში გაშვებული რაკეტების ღირებულებას ის ფართო დიაპაზონით აფასებს, რადგან ჯერჯერობით უცნობია თითოეული ტიპის რაკეტების ზუსტი რაოდენობა. გამოცემა მიუთითებს, რომ დამატებითი ინფორმაციის გაჩენის შემთხვევაში, დათვლები შესაძლოა დარედაქტირდეს.
„არსებობს ცნობები, რომ რუსეთმა ისროლა Х-101, Х-555, „კალიბრი“, „ისკანდერი“, С-300, „ტორნადო-C“ და სხვა ტიპის რაკეტები. საერთო ღირებულების დასათვლელად Forbes-მა თითოეული რაკეტის ფასები გამოიყენა: Х-101 – $13 მლნ, „კალიბრი“ – $6,5 მლნ, „ისკანდერი“ – $3 მლნ, „ონიქსი“ – $1,25 მლნ, Х-22 – $1 მლნ, „ტოჩკა-U” – $0,3 მლნ,“ – წერს გამოცემა და დასძენს, რომ 10 ოქტომბერს გაშვებული დრონების საერთო ღირებულება რამდენიმე მილიონი დოლარია.
როგორც Forbes-ი აღნიშნავს, ერთ-ერთი უკანასკნელი მასირებული შეტევის დროს, 25-26 ივნისს, რუსეთისა და ბელარუსის მხრიდან უკრაინაში 60-დან 80-მდე რაკეტა გაუშვეს – ჯამში $150-220 მილიონის.
ომის პირველ ორ თვეში რუსებმა უკრაინაში ისროლეს 1300-ზე მეტი რაკეტა, რომელთა ღირებულებაც Forbes-მა $7,5 მილიარდად შეაფასა.
ბლოგერი, სამხედრო-პოლიტიკური მიმომხილველი ოლექსანდრ კოვალენკო მიიჩნევს, რომ 10 ოქტომბრის მასირებული შეტევისას რუსეთმა რაკეტების მნიშვნელოვანი რესურსი გახარჯა.
„ეს იყო კომბინირებული შეტევა. გამოიყენებოდა დრონები „შაჰედ-136“, რაკეტები Х-22, Х-101, რუსეთის სტრატეგიული გამანადგურებლების თითქმის მთელი საავიაციო ჯგუფი – ТУ-22М3, ТУ-95МС, ТУ-160. ამისთვის სერიოზულად მოემზადნენ,“ – ამბობს კოვალენკო გამოცემა ГлавРед-თან ინტერვიუში.
კოვალენკოს აზრით, შეტევა, რომელიც 10 ოქტომბერს დაიწყო – დროებითია და ის ასეთივე მასშტაბით მთელი კვირისა თუ თვის განმავლობაში ვერ გაგრძელდება.
„უკრაინისთვის ყველაზე საშიში რაკეტა ეს Х-47М „კინჟალია“, რადგან მათი განადგურება ძალიან რთულია. რუსეთის სარაკეტო შეიარაღებაში ის ყველაზე ძნელად ჩამოსაგდები რაკეტაა, თუმცა ასეთი მათ დაახლოებით სამი ათეული ცალი აქვთ. რუსეთს მათი წარმოება არ შეუძლია, რადგან ამ რაკეტების შემადგენლობაში დიდი რაოდენობით უცხოური წარმოების მიკროსქემა და მიკროელემენტია. „კინჟალის“ წარმოება სრულიად შეჩერებულია და ამიტომაც მას იშვიათად იყენებენ. 10 ოქტომბერს რუსეთმა, ფაქტობრივად, რაკეტების ხელშეუხებელი მარაგი გამოიყენა.
ეს კვირები ვერ გაგრძელდება, რადგან რუსებს საბრძოლო რეზერვების შევსება დასჭირდებათ. ამას კი დრო უნდა.
რუსებს არ შეუძლიათ დაბომბვა გააგრძელონ 24/7-ზე, ერთი ან ორი კვირა ზედიზედ, რადგან მათ ამის რესურსი არ აქვთ. შესაბამისად, მათმა რეფლექსიამ ისევ რუსეთის სამხედრო პოტენციალი შეამცირა, ვერცერთი ტაქტიკური თუ სტრატეგიული დონის საკითხი მათ ამ შეტევით ვერ გადაჭრეს,“ – მიიჩნევს კოვალენკო.
უკრაინის 20-ზე მეტ ქალაქზე სარაკეტო შეტევა 10 ოქტომბერს დილით დაიწყო. დაიბომბა დედაქალაქიც. ბოლო მონაცემებით, დაიღუპა 19 და დაიჭრა 105 ადამიანი.
10 ოქტომბრის 17:00 საათის მონაცემებით, რუსეთმა უკრაინაში 84 ფრთოსანი რაკეტა და 24 დრონი გაუშვა, მათგან 43 რაკეტა და 13 უპილოტო საფრენი აპარატი უკრაინის ძალებმა ჩამოაგდეს.
