ბათუმში, ტბელ აბუსერიძის 38-ში მცხოვრები მოქალაქე, ავთანდილ ბოლქვაძე აცხადებს, რომ ბათუმის მუნიციპალურმა ინსპექციამ თავის საკუთრებაზე ბანერის გაკვრისთვის 500 ლარით დააჯარიმა. დღეს, 11 ოქტომბერს, ბათუმის საქალაქო სასამართლო განიხილავს ამ დაჯარიმების საქმეს და გადაწყვეტს, რამდენად კანონიერად გაატარა ინსპექციამ სანქცია მოქალაქის წინააღმდეგ.
მოქალაქე 500 ლარით 29 ივლისს დააჯარიმეს. ავთანდილ ბოლქვაძის აზრით კი, „მუნიციპალური ინსპექციის“ გადაწყვეტილება პოლიტიკურად მოტივირებულია.
ავთანდილ ბოლქვაძის თქმით, ერთი პოსტერი – „თავისუფლება მიშას“, თავისივე საცხოვრებელი ბინის აივანზეა განთავსებული, უკრაინისა და საქართველოს სახელმწიფო დროშებთან ერთად, მეორე ბანერი კი კაფე-ბარ „მუხამბაზის“ გვერდით, კედელზეა მიკრული, სადაც წერია: „რუსეთი ოკუპანტია“, „მუხამბაზი“ რუს ოკუპანტებს არ ღებულობს“.
ავთანდილ ბოლქვაძის აზრით, მუნიციპალური ინსპექცია სწორედ ამ ბანერებმა გააღიზიანა, რადგან უშუალოდ კაფე-ბარის რეკლამა, ოთხი წლის წინ, კანონის დაცვით აქვს განთავსებული.
„ეს კაფე-ბარი არის ჩემი მეუღლის და კაფეს თავზე ქართულ და ინგლისურ ენაზე აწერია „ქართული სამზარეულო“. ყველა წესის დაცვით აქვს გაკეთებული. ოთხი წლის წინ განვათავსეთ ეს რეკლამა.
მიშას და უკრაინის მხარდამჭერი ბანერები კი უკრაინაში ომის დაწყების შემდეგ განვათავსეთ. დავაწერეთ, რომ კაფე რუს ოკუპანტებს არ იღებს. ბევრი რუსი ამის გამო არც შემოდიოდა კაფეში, სამი შემთხვევა იყო, როცა ბოდიში მოგვიხადეს რუსეთის მოქალაქეებმა, აღიარეს, რომ რუსეთი არის ოკუპანტი და ჩვენც ამის შემდეგ ვუმასპინძლეთ.
„თავისუფლება მიშას“ კი, ეს პოსტერი, პირადად ჩემს საკუთრებაში, ჩემს აივანზეა გაკრული და კაფესთან და ჩემი მეუღლის საკუთრებასთან არანაირი შეხება არ აქვს. სწორედ ამ პოსტერზე აქვს მუნიციპალურ ინსპექციას გართულება“, – ამბობს ავთანდილ ბოლქვაძე.
მუნიციპალურმა ინსპექციამ მოქალაქე 19 ივლისს გააფრთხილა.
„მუნიციპალური ინსპექცია გაფრთხილებთ, რომ დაუყოვნებლივ მოახდინოთ აბუსერიძის 38 ნომერში თქვენ მიერ თვითნებურად განთავსებული გარე რეკლამის დემონტაჟი. წინააღმდეგ შემთხვევაში, გატარდება კანონით გათვალისწინებული ზომები“, – წერია გაფრთხილების დოკუმენტში, რომელსაც ინსპექციის დირექტორი, არჩილ კონცელიძე აწერს ხელს.
