ყირგიზეთის ხელისუფლებამ თავის ტერიტორიაზე ОДКБ-ს წვრთნების გაუქმების შესახებ გადაწყვეტილება მიიღო. ამის შესახებ ყირგიზეთის „რადიო თავისუფლების“ ბიურო – Радио Азаттык ქვეყნის თავდაცვის სამინისტროზე დაყრდნობით წერს.
როგორც ყირგიზეთის თავდაცვის სამინისტროს პრესსამსახური იუწყებოდა, მიმდინარე წლის ოქტომბერში, ყირგიზეთის ტერიტორიაზე, ОДКБ-ს სამშვიდობო ძალებთან ერთად, სამეთაურო-საშტაბო წვრთნები – „ურღვევი ძმობა-2022“ უნდა ჩატარებულიყო.
წვრთნებზე უარის გადაწყვეტილების მიზეზებს უწყება არ ასახელებს.
თუმცა, Радио Азаттык-ი მიუთითებს 14-17 სექტემბერს ქვეყანაში განვითარებულ დრამატულ მოვლენებზე, როდესაც ყირგიზეთისა და ტაჯიკეთის სამხედრო ძალებს შორის მასშტაბური შეიარაღებული შეტაკება მოხდა. შედეგად ყირგიზეთის 63 მოქალაქე დაიღუპა და 200-მდე დაიჭრა, ტაჯიკეთთან სასაზღვრო ზოლში მცხოვრები დაახლოებით 140 ათასი ადამიანი კი იძულებული გახდა დაეტოვებინა საკუთარი სახლი.
18 სექტემბერს ყირგიზეთმა ოფიციალურად დაადანაშაულა ტაჯიკეთი სამხედრო აგრესიაში. თავის მხრივ ტაჯიკეთმაც იდენტურად შეაფასა ყირგიზეთთან სამხედრო შეტაკება და განაცხადა, რომ მისი 41 მოქალაქე დაიღუპა ამ შეიარაღებული კონფლიქტის შედეგად.
ამის შემდეგ ყირგიზეთის ხელისუფლებამ ОДКБ-ს მოუწოდა აქტიური მონაწილეობა მიეღო ტაჯიკეთთან ქვეყნის საზღვარზე დაძაბული სიტუაციის მოგვარებაში. ყირგიზეთმა ასევე მოუწოდა ОДКБ-ს შეცვალოს დოკუმენტები, რათა არ დაუშვას შეიარაღებული თავდასხმა წევრ სახელმწიფოებს შორის და არსებული უთანხმოება გადაჭრას მშვიდობიანი გზით.
კოლექტიური უსაფრთხოების ხელშეკრულების ორგანიზაციის (ОДКБ) წევრები არიან: სომხეთი, ბელარუსი, ყაზახეთი, ყირგიზეთი, რუსეთი და ტაჯიკეთი.
მაისში რუსეთის პრეზიდენტმა ვლადიმერ პუტინმა ОДКБ-ს საიუბილეო სამიტზე „თანამოაზრეები“ შეკრიბა, სადაც ისაუბრა უკრაინასთან ომში მხარდაჭერაზე, მაგრამ მხარდაჭერა მხოლოდ ბელარუსისგან მიიღო.
ამის მიუხედავად, აგვისტოში რუსეთმა მოახერხა უზბეკეთის, ტაჯიკეთის და ყირგიზეთის მოქალაქეების „დამუშავება“ რუსეთის არმიის სასარგებლოდ. 13 სექტემბერს უკრაინის არმიამ პირველად დაატყვევა დაქირავებული ჯარისკაცი, რომელიც უზბეკეთის მოქალაქე იყო.
რუსეთში საყოველთაო მობილიზაციის გამოცხადების შემდეგ, ყაზახეთმა, ყირგიზეთმა და უზბეკეთმა [ეს უკანასკნელი 2012 წლიდან აღარ არის ОДКБ-ს წევრი], თავის მოქალაქეებს მოუწოდეს უკრაინის ომში რუსეთის მხარეს არ იბრძოლონ, რადგან ეს სისხლის სამართლის დანაშაულია.
ყაზახეთის საგარეო საქმეთა სამინისტროს წარმომადგენელმა აიბეკ სმადიაროვმა კი საჯაროდ აღნიშნა, რომ კოლექტიური უსაფრთხოების ხელშეკრულების ორგანიზაციის წევრები [ОДКБ] არ მიიღებენ მონაწილეობას რუსეთის ომში უკრაინის წინააღმდეგ: „ორგანიზაციის პასუხისმგებლობაში ეს არ შედის“.
სექტემბრის ბოლოს ОДКБ წვრთნები სომხეთმაც მიატოვა.
____
ამავე თემაზე:
