რუსეთში ნაწილობრივი მობილიზაციის გამოცხადებას და პუტინის მუქარას ბირთვული იარაღის გამოყენებაზე უკვე მოჰყვა გამოხმაურება ამერიკელი და ბრიტანელი დიპლომატებისგან.
აშშ-ის ელჩმა უკრაინაში ბრიჯიტ ბრინკმა მობილიზაციის გამოცხადება და ფიქტიური რეფერენდუმები სისუსტედ და რუსეთის მარცხის დასტურად შეაფასა.
„შეერთებული შტატები არასოდეს აღიარებს რუსეთის პრეტენზიებს ვითომ ანექსირებულ უკრაინულ ტერიტორიებზე. ჩვენ კვლავაც ვიდგებით უკრაინასთან, ვიდრე ეს საჭირო იქნება,“ – დაწერა ელჩმა ტვიტერზე.
პუტინის გამოსვლას უსმინა დიდი ბრიტანეთის ელჩმა მელინდა სიმონსმაც.
„ის კვლავაც უარს ამბობს, გაუგოს უკრაინას. ნაწილობრივი მობილიზაცია და ფიქტიური რეფერენდუმები ვერ შეცვლიან არსებით სისუსტეს,“ – წერს მელინდა სიმონსი.
რუსეთში დიდი ბრიტანეთის ყოფილმა ელჩმა ტონი ბენტონმა კი Sky News უთხრა, რომ პუტინის ნაწილობრივი მობილიზაცია უკრაინასთან ომში „საკმაოდ მნიშვნელოვანი ესკალაციაა.“
მისი თქმით, რუსეთი ამ დრომდე აწარმოებდა ამ ომს „ზურგს უკან შეკრული ხელით“, უარს ამბობდა მობილიზაცია, რადგან პუტინს რუსეთში საზოგადოებრივი აზრის ეშინოდა.
„ის, რაც პუტინმა ახლა გამოაცხადა – ეს მობილიზაციაა, რომელზეც ის ომის დასაწყისიდანვე უარს ამბობდა. ახლა მან მიიღო თავისი სამხედროების რჩევა და ბირთვულ საფრთხეებზე საუბარსაც დაუბრუნდა“, – ამბობს ბენტონი და დასძენს, რომ პუტინის რიტორიკაში ეს მნიშვნელოვანი ნაბიჯია.
მისი თქმით, „რუსული საზოგადოების თვალში“, ის რაც აქამდე წარმოჩენილი იყო, როგორც „სამხედრო ოპერაცია“, ახლა უკვე „ომს“ უახლოვდება.
რუსეთის პრეზიდენტმა დღეს გამოაცხადა ნაწილობრივი სამხედრო მობილიზაცია, რომელიც დღეიდან დაიწყება. გაწვევა ეხება მხოლოდ იმ მოქალაქეებს, ვინც რეზერვში იმყოფება, ვისაც უმსახურია შეიარაღებულ ძალებში და აქვს კონკრეტული სამხედრო სპეციალობა და შესაბამისი გამოცდილება.
მობილიზაციის გამოცხადების შემდეგ, პუტინმა რუსეთის მიმართ დასავლეთის აგრესიულ პოლიტიკაზე ილაპარაკა, დასავლეთი ბირთვულ შანტაჟში დაადანაშაულა და გაფრთხილება გაუგზავნა – „რუსეთს NATO-ზე თანამედროვე იარაღიც აქვს“ და „საკუთარი ქვეყნის დასაცავად ყველა საშუალებას გამოიყენებს“.
