ნეტგაზეთი • RU

რუსეთმა უკრაინელთა შიშით წყალქვეშა ხომალდები ყირიმიდან გაიყვანა – ბრიტანეთის დაზვერვა

დიდი ბრიტანეთის დაზვერვის ცნობით, რუსეთის შავი ზღვის ფლოტის სარდლობამ თავისი KILO-კლასის წყალქვეშა ხომალდები ყირიმის სევასტოპოლის პორტიდან, რუსეთის სამხრეთში, ნოვოროსიისკში გადაიყვანა.

უწყების ვარაუდით, რუსეთი უფრო და უფრო მეტ საფრთხეს გრძნობს თავისი ფლოტის მიმართ, რადგან ხედავს, რომ უკრაინის ძალებს შორ მანძილზე თავდასხმა წარმატებით შეუძლიათ.

„ბოლო ორ თვეში, ფლოტის სამეთაურო შტაბები და საზღვაო ავიაციის მთავარი ბაზები უკრაინელთა სამიზნე გახდა,“ – წერს უწყებს 20 სექტემბრის რელიზში.

დაზვერვის შეფასებით, სწორედ ყირიმში შავი ზღვის ფლოტის ყოფნა იყო ერთ-ერთი საფუძველი, რამაც ვლადიმერ პუტინს 2014 წელს ყირიმის ნახევარკუნძულის ანექსია გადააწყვეტინა, თუმცა დღეისთვის ბაზის უსაფრთხოება უკრაინის წინააღმდეგ რუსეთის სამხედრო აგრესიის გამო მნიშვნელოვნად შერყეულია.

გაერთიანებული სამეფოს თავდაცვა უკრაინის შესახებ სადაზვერვო ცნობარს ყოველდღიურად აქვეყნებს. გუშინდელ რელიზში უწყება უკრაინელთა კონტრშეტევის შედეგად რუსეთის დანაკარგებზე ამახვილებდა ყურადღებას და წერდა, რომ ბოლო 10 დღეში, რუსეთმა სულ მცირე ოთხი საბრძოლო თვითმფრინავი დაკარგა, რის გამოც, სამხედრო აგრესიის დაწყების შემდეგ, მათი რაოდენობა 55-მდე ჩამოვიდა.

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.