დიდი ბრიტანეთის დაზვერვის უახლესი რელიზის თანახმად, უკრაინის ძალები განაგრძობენ კონტროლის გამყარებას ხარკოვის ოლქის გათავისუფლებულ ტერიტორიებზე, რუსეთის ძალები კი დასავლეთით, მდინარე ოსკილისკენაა გაყვანილი.
„ბოლო კვირაში რუსეთის ძალების რაიონიდან გასვლის გზები სხვადასხვანაირი იყო: – ზოგიერთმა დანაყოფმა უკან დაიხია კარგ მდგომარეობაში და ორგანიზებულად, მაშინ, როდესაც სხვები აშკარად პანიკაში იყვნენ და უკონტროლოდ გარბოდნენ,“ – წერს დაზვერვა 15 სექტემბრის რელიზში.
უწყება ხაზს უსვამს, რომ რუსმა სამხედროებმა გაქცევისას დატოვეს ძვირადღირებული შეიარაღება, მათ შორის საარტილერიო ბრძოლების საწარმოებლად აუცილებელი სისტემები:
„მათ შორისაა სულ მცირე ერთი რადიოლოკაციური სისტემა „ზოოპარკ 1-M“ და არტილერიის მართვისა და კონტროლის სულ მცირე ერთი მანქანა IV14“.
დაზვერვის შეფასებით, ტექნიკის ასე მიტოვების ფაქტი ხაზს უსვამს არაორგანიზებულ უკან დახევას და ბრძანებისა და მართვის უგულებელყოფას.
გაერთიანებული სამეფოს თავდაცვა გუშინდელ რელიზში ყურადღებას ამახვილებდა იმ ფაქტზე, რომ რუსეთი შეიარაღების სერიოზულ დეფიციტს განიცდის და უფრო და უფრო ხშირად მიმართავს დახმარებისთვის ისეთ ქვეყნებს, როგორებიც ირანი და ჩრდილოეთ კორეაა.
___
რუსეთმა 1 კვირაში $670 მილიონის ტექნიკა დაკარგა კონტრშეტევის შედეგად – Forbes
