უკრაინის კონტრდაზვერვამ ზაპოროჟიეში დააკავა რუსეთის აგენტი, რომელიც მოხალისედ ასაღებდა თავს, სინამდვილეში კი ეფესბეს უკრაინის შეიარაღებული ძალების კოორდინატებს აწვდიდა. უშიშროების ინფორმაციით, აგენტი ქალია, მეტსახელით – „007“.
„ის ზაპოროჟიეს ოლქის დროებით ოკუპირებული პოლოგოვსკის რაიონის მცხოვრებია, რომელიც რუსეთის სპეცსამსახურებმა სრულმასშტაბიანი ომის დასაწყისში გადაიბირეს. თავისი რუსი „კურატორისგან“ მას მიენიჭა მეტსახელი „007“. აგენტს დავალებული ჰქონდა სადაზვერვო საქმიანობა უკრაინის ტერიტორიაზე. დანაშაულის შესანიღბად, ის მოხალისედ ასაღებდა თავს,“ – წერს უკრაინის უშიშროება.
უწყების ცნობით, ქალი სამხრეთის დროებით ოკუპირებულ ტერიტორიაზე პარტიზანული მოძრაობის წევრების შესახებ ინფორმაციას აგროვებდა. უშიშროების მტკიცებით, „007-ს“ ასევე დავალებული ჰქონდა, დაემყარებინა ურთიერთობა უკრაინის დამცველებთან, რათა მათი ადგილმდებარეობა და გადაადგილების მარშრუტი დაედგინა. მიღებული კოორდინატების, პირადი შემადგენლობისა და თავდაცვის ძალების ტექნიკის შესახებ მონაცემების გადაცემას ის სპეციალურად შექმნილი ანონიმური ტელეგრამარხით აპირებდა.
უშიშროება აცხადებს, რომ ჯაშუში მანამდე ამხილეს და დააკავეს, ვიდრე ის ინფორმაციის ეფესბესთვის მიწოდებას მოახერხებდა. აგენტ „007-ს“ ბრალი სახელმწიფოს ღალატში ედება, სასამართლომ მას უკვე შეუფარდა წინასწარი პატიმრობა.
