უკრაინის გენშტაბის ცნობით, უკრაინის არმიამ სევასტოპოლის საზღვაო ქვეითი ბრიგადის პირადი შემადგენლობის 85 % გაანადგურა.
„ხერსონის მიმართულებაზე წარმატებული სამხედრო მოქმედებების შემდეგ, მტერმა მნიშვნელოვანი დანაკარგი განიცადა. არსებული მონაცემებით, საზღვაო ქვეითთა 810-ე ცალკეულმა ბრიგადამ, რომლის დისლოკაციის ადგილიც სევასტოპოლია, თავისი პირადი შემადგენლობის 85 % დაკარგა,“ – წერს უკრაინის გენშტაბი.
გენშტაბის ცნობით, დანარჩენ სამხედროებს ძალიან დაბალი მორალური და ფსიქოლოგიური განწყობა აქვთ: „ისინი მასობრივად ამბობენ უარს საბრძოლო მოქმედებების ზონაში დაბრუნებაზე.“
ხერსონის მიმართულებაზე კონტრშეტევა უკრაინის არმიამ 29 აგვისტოს დაიწყო, პარალელურად, გრძელდებოდა თავდასხმები რუსეთის არმიის ბაზებზე, საბრძოლო საწყობებზე და ლოგისტიკურ ქსელებზე – უკრაინის არმიამ დნეპრზე გადასასვლელი ყველა საავტომობილო ხიდი დააზიანა.
დიდი ბრიტანეთის დაზვერვის ცნობით, ხერსონთან, მდინარე დნეპრის გასწვრივ, რუსეთი მთელი ძალით ცდილობს საკმარისი რესურსების მობილიზებას.
„იმპროვიზებული მცურავი ხიდი, რომლის მშენებლობაც რუსეთმა ორი კვირის წინ დაიწყო, დაუსრულებელია. უკრაინის შორსმოქმედი არტილერია ახლა უკვე ისეთი სიხშირით ურტყამს დნეპრის გადასასვლელებს, რომ რუსეთი დაზიანებული საავტომობილო ხიდების შეკეთებას ვეღარ ასწრებს,“ – მიუთითებს დაზვერვა.
6 სექტემბერს უკრაინამ კონტრშეტევა დაიწყო ხარკოვის ოლქშიც – უკრაინის ხელისუფლებისა და საერთაშორისო უწყებების ცნობით, გათავისუფლებულია 3 000 კმ2-ზე მეტი ტერიტორია, რუსეთის თავდაცვამ კი ოლქიდან ჯარების გაყვანის ბრძანება გასცა.
