დიდი ბრიტანეთის დაზვერვის ინფორმაციით, უკრაინამ, ოთხშაბათის შემდეგ, ხარკოვის ოლქში, სულ მცირე ლონდონის რაიონზე (Greater London – 1,569 კმ²) ორჯერ დიდი ტერიტორია დაიბრუნა.
„ამ სექტორში მხოლოდ იზოლირებულ ადგილებში რჩება წინააღმდეგობა. უკრაინის კონტრშეტევის პირისპირ დარჩენილმა რუსეთის სარდლობამ, სავარაუდოდ, მდინარე ოსკილის დასავლეთ სანაპიროდან, ოკუპირებული ხერსონის ოლქიდან თავისი ჯარების გაყვანის ბრძანება გასცა,“ – წერს უწყება 12 სექტემბრის რელიზში.
დაზვერვის ცნობით, პარალელურად, სამხრეთში, ხერსონთან, მდინარე დნეპრის გასწვრივ, რუსეთის მთელი ძალით ცდილობს საკმარისი რესურსების მობილიზებას.
„იმპროვიზებული მცურავი ხიდი, რომლის მშენებლობაც რუსეთმა ორი კვირის წინ დაიწყო, დაუსრულებელია. უკრაინის შორსმოქმედი არტილერია ახლა უკვე ისეთი სიხშირით ურტყამს დნეპრის გადასასვლელებს, რომ რუსეთი დაზიანებული საავტომობილო ხიდების შეკეთებას ვეღარ ასწრებს,“ – მიუთითებს დაზვერვა.
უწყების შეფასებით, უკრაინის სწრაფი წარმატება სერიოზულ ზიანს აყენებს რუსეთის საერთო გეგმებს – უკრაინაში მისი ძალების დიდი ნაწილი იძულებულია თავდაცვაზე გადავიდეს, სარდლობისადმი ისედაც შესუსტებულ ნდობა კი კიდევ უფრო უარესდება.
უკრაინის გენშტაბის ცნობით, გუშინ, 11 სექტემბერს, უკრაინის არმიამ კიდევ 20 დასახლებული პუნქტი გაათავისუფლა.
აშშ-ის ომის კვლევის ინსტიტუტის თანახმად კი უკრაინის ძალებმა ბოლო 5 დღის განმავლობაში დაიკავეს 3 000 კვადრატული კილომეტრი, მეტი, ვიდრე რუსეთმა აპრილის შემდეგ.
ხერსონის მიმართულებით კონტრშეტევა უკრაინის არმიამ 29 აგვისტოს დაიწყო, ხარკოვის ოლქში კი – 6 სექტემბერს.
