უკრაინამ ომის მიმდინარეობაში გარდატეხა მოახდინა, თუმცა ეს კონტრშეტევა ომს ვერ დაასრულებს: გარკვეული დროის შემდეგ რუსეთის ჯარები თავდაცვის ახალ ხაზს მოაწყობენ და ადგილობრივ შეტევებსაც დაიწყებენ; უკრაინის შეიარაღებულ ძალებს დასჭირდებათ შეტევების ახალი ტალღა მთელი ტერიტორიის გასათავისუფლებლად – სავარაუდოდ, ომი 2023 წელსაც გაგრძელდება.
ასეთ დასკვნამდე მიდიან აშშ-ის ომის კვლევის ინსტიტუტის (ISW) ანალიტიკოსები უკრაინის შესახებ ახალ ანგარიშში.
„უკრაინის ხელისუფლება დემონსტრაციულად განიხილავდა ხერსონის კონტრშეტევისთვის მზადებას და ამით რუსეთის ყურადღება გადაიტანა იმ ტერიტორიიდან, რომელზეც ძირითად დარტყმას აპირებდა. საფუძვლიანი მომზადების შედეგად, გეგმამ იმუშავა. გეგმის მნიშვნელოვანი ნაწილი იყო თავდასხმები მტრის ლოგისტიკურ ქსელებზე ხერსონისა და ხარკოვის ოლქებში, რისთვისაც უკრაინის არმია ეფექტიანად იყენებდა „ჰაიმარსებსა“ და სხვა დასავლურ შეიარაღებას,“ – წერს ISW
ინსტიტუტის ექსპერტების აზრით, უკრაინამ ომში გარდატეხა მოახდინა – ახლა სწორედ უკრაინის არმია განსაზღვრავს საბრძოლო მოქმედებების ხასიათსა და ადგილს, ხოლო რუსეთი უფრო და უფრო არაადეკვატურად უპასუხებს ამ ზეწოლას – როგორც ფიზიკურად, ისე ფსიქოლოგიურად.
ISW ხაზს უსვამს, რომ მიმდინარე კონტრშეტევა უკრაინას ომის დასრულების საშუალებას არ მისცემს. რუსეთი გარკვეულ მომენტში შეძლებს თავდაცვის ახალი ხაზის შექმნას და მცირე შეტევებზე გადასვლას.
„უკრაინას შეტევების კიდევ ერთი სერია დასჭირდება დროებით ოკუპირებული ტერიტორიების გასათავისუფლებლად, ამიტომაც ომი, სავარაუდოდ, 2023 წელსაც გაგრძელდება,“ – წერს ISW.
ISW-ის სხვა მთავარი მიგნებები:
- რუსეთმა სერიოზული ოპერატიული მარცხი განიცადა ხარკოვის ოლქში. უკრაინის ძალებმა ელვისებური კონტრშეტევით თითქმის მთელი რეგიონი დაიბრუნეს;
- უკრაინის ძალებმა წაიწიეს წინ ვოლჩანსკსა და ველიკი ბურლუკში,
- რუსეთის თავდაცვამ დაადასტურა ხარკოვის ოლქიდან ჯარების გაყვანა;
- იზიუმის აღება ამ სექტორში რუსეთის გეგმებს მთლიანად შლის;
- სამხრეთში პოზიციური ბრძოლები გრძელდება. უკრაინის არმია მტრის ზურგში დარტყმებს განაგრძობს – ბაზებზე, საწყობებსა და სატრანსპორტო საშუალებებზე;
- რუსეთის დანაკარგების კომპენსირებას ყველა შესაძლო ძალით ცდილობს;
- კონტრშეტევამ რუსეთი აიძულა ე.წ. რეფერენდუმების თარიღი განუსაზღვრელი ვადით გადაეწია.
აშშ-ის ომის კვლევის ინსტიტუტის გუშინდელი ანგარიშის თანახმად, უკრაინის ძალებმა ბოლო 5 დღის განმავლობაში დაიკავეს 3 000 კვადრატული კილომეტრი, მეტი, ვიდრე რუსეთმა აპრილის შემდეგ.
უკრაინის გენშტაბის ცნობით, გუშინ, 11 სექტემბერს, უკრაინის არმიამ კიდევ 20 დასახლებული პუნქტი გაათავისუფლა.
ხერსონის მიმართულებით კონტრშეტევა უკრაინის არმიამ 29 აგვისტოს დაიწყო, ხარკოვის ოლქში კი – 6 სექტემბერს.
