ნეტგაზეთი • RU

იზიუმი თავისუფალია, უკრაინელი სამხედროები ჯერ ისევ მუშაობენ – მერის მოადგილე

უკრაინის ქალაქ იზიუმის მერის მოადგილე, ვლადიმერ მაცოკინი აცხადებს, რომ იზიუმი განთავისუფლდა რუსული ოკუპაციისგან. მისი თქმით, ხარკოვის რეგიონის უმაღლეს წერტილზე უკვე უკრაინის დროშა ფრიალებს.

იზიუმის მერის მოადგილის კომენტარს უკრაინული 24tv.ua ავრცელებს.

მაცოკინმა განაცხადა, რომ უკრაინის შეიარაღებული ძალები იზიუმში არიან განლაგებული. მისივე თქმით, სამხედრო ოპერაცია დასრულებული არ არის და უკრაინელი სამხედროები ჯერ ისევ მუშაობენ.

„კრემენეცის მთაზე, ეს ხარკოვის ოლქის ყველაზე მაღალი წერტილია, უკვე ჩვენი ლურჯ-ყვითელი დროშა ფრიალებს. ეს დადასტურებულია“  – აცხადებს მერის მოადგილე.

მისივე თქმით, ეს ქალაქის გათავისუფლების დღე და ნამდვილი დღესასწაულია.

ამ დროისათვის ვრცელდება ცნობები იმის შესახებ, რომ ბრძოლა მიმდინარეობს ქალაქ ლიმანისთვის, ასევე, უკრაინელები უკვე არიან ქალაქ ლისიჩანსკისთან.

გუშინ, 9 სექტემბერს, უკრაინის პრეზიდენტმა ვოლოდიმირ ზელენსკიმ განაცხადა, რომ უკრაინის შეიარაღებულმა ძალებმა ხარკოვის ოლქში 30-ზე მეტი დასახლება აიღეს.

„ყველგან ვაბრუნებთ უკრაინის დროშას“, — განაცხადა ზელენსკიმ ვიდეომიმართვაში.

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com