ლუგანსკის ოლქის რეგიონული სამხედრო ადმინისტრაციის ხელმძღვანელის, სერგეი გაიდაის განცხადებით, უკრაინელი ჯარისკაცები ლისიჩანსკთან იმყოფებიან. უკრაინამ ეს ქალაქი 2022 წლის ივლისში დაკარგა.
დღეს, 10 სექტემბერს, გაიდაი აცხადებს, რომ უკრაინელი ჯარისკაცები ამჟამად იმყოფებიან ქალაქ ლისიჩანსკთან ახლოს. სხვა დეტალებზე გაიდაი არ საუბრობს, მაგრამ მან ფეისბუქზე დაწერა:
„ლისიჩანსკი… მშვენიერი უკრაინული ქალაქი. ოჰ, რამდენი სამუშაო იქნება საჭირო აღსადგენად“.
დღეს, 10 სექტემბერს, ტელეგრამის არხებზე დილიდან ვრცელდება ინფორმაცია უკრაინის კიდევ რამდენიმე ქალაქის დეოკუპაციის შესახებ, ოფიციალურ კომენტარს ამ დრომდე არ აკეთებს უკრაინის გენერალური შტაბი.
უკრაინის პრეზიდენტმა ვოლოდიმირ ზელენსკიმ განაცხადა, რომ უკრაინის შეიარაღებულმა ძალებმა ხარკოვის ოლქში 30-ზე მეტი დასახლება აიღეს.
„ყველგან ვაბრუნებთ უკრაინის დროშას და ჩვენი ხალხის დაცვას“, — განაცხადა ზელენსკიმ ვიდეომიმართვაში.
