ხარკოვის სამხედრო ადმინისტრაციის ხელმძღვანელის, ოლეგ სინეგუბოვის ცნობით, უკრაინელმა ჯარისკაცებმა რუსეთის ოკუპაციური არმიისგან გაათავისუფლეს ქალაქი ბალაკლია.
სინეგუბოვმა თავის ოფიციალურ ტელეგრამ არხზე მოკლე ვიდეოც გამოაქვეყნა, რომელშიც ჩანს, რომ ქალაქ ბალაკნიას ადმინისტრაციულ შენობაზე უკრაინის დროშა ფრიალებს.
უკრაინის ქალაქი ბალაკნია მარტში დაიკავა რუსეთის საოკუპაციო ჯარმა.
„ბალაკლია უკრაინაა!
დღეს აქ უკრაინის დროშა აღმართეს სამხედროებთან ერთად, უკრაინის შეიარაღებული ძალების სახმელეთო ჯარების მეთაურის, ალექსანდრ სირსკის მეთაურობით.
ბიჭებო და გოგოებო შეიარაღებული ძალებიდან, დღეს თქვენ ქმნით თავისუფალი უკრაინის ახალ ისტორიას, ჩვენ ვამაყობთ!
გაგრძელება იქნება..“ – წერს სინეგუბოვი ტელეგრამზე.
დღეს, 10 სექტემბერს, ტელეგრამის არხებზე დილიდან ვრცელდება ინფორმაცია უკრაინის კიდევ რამდენიმე ქალაქის დეოკუპაციის შესახებ, ოფიციალურ კომენტარს ამ დრომდე არ აკეთებს უკრაინის გენერალური შტაბი.
უკრაინის პრეზიდენტმა ვოლოდიმირ ზელენსკიმ განაცხადა, რომ უკრაინის შეიარაღებულმა ძალებმა ხარკოვის ოლქში 30-ზე მეტი დასახლება აიღეს.
„ყველგან ვაბრუნებთ უკრაინის დროშას და ჩვენი ხალხის დაცვას“, — განაცხადა ზელენსკიმ ვიდეომიმართვაში.
