რთულად, მაგრამ წინ მივიწევთ – ზალუჟნი კონტრშეტევაზე

უკრაინის შეიარაღებული ძალების მთავრსარდალი, ვალერი ზალუჟნი უკრაინელთა კონტრშეტევაზე პირველ კომენტარს აკეთებს.

„1 000 კმ 2-ზე მეტი ტერიტორიაა გათავისუფლებული ოკუპანტებისგან ბოლო რამდენიმე დღეში. ძალიან გვიჭირს, მაგრამ წინ მივიწევთ. მადლობლები ვართ ჩვენი თანამოქალაქეების, რომლებიც გვეხმარებიან და გველოდებიან“, – წერს ვალერი ზალუჟნი ტელეგრამზე.

ზალუჟნიმ ტელეგრამზე აქვეყნებს ვიდეოსაც, როგორ ხვდებიან მოქალაქეები გათავისუფლებულ დასახლებულ პუნქტებში შესულ უკრაინელ სამხედროებს.

გენშტაბის ინფორმაციით, უკრაინის შეიარაღებულმა ძალებმა ბოლო სამ დღეში ხარკოვის ოლქში 50 კილომეტრით დაახევინეს მტერს უკან და 20-ზე მეტი დასახლებული პუნქტი გაათავისუფლეს.

აშშ-ის ომის კვლევის ინსტიტუტი დღევანდელ ანგარიშში წერდა, რომ უახლოესი საათების განმავლობაში, უკრაინის არმია, სავარაუდოდ, კუპიანსკსაც დაიკავებს.

უკრაინის პრეზიდენტმა ვოლოდიმირ ზელენსკიმ გუშინ საღამოს დაადასტურა, რომ უკრაინის ძალებმა ხარკოვის ოლქის ქალაქი ბალაკელა გაათავისუფლეს.

დაახლოებით ერთი საათის წინ კი [14:30] უკრაინის ნაციონალურმა გვარდიამ დაადასტურა, რომ უკრაინის კონტროლქვეშ დაბრუნდა ხარკოვის ოლქის სოფელი ვოლოხოვ იარი.