აშშ-ის თავდაცვის მდივნის, ლოიდ ოსტინის განცხადებით, უკრაინა შეერთებული შტატებისგან კიდევ 675 მილიონი დოლარის დახმარებას მიიღებს.
„ბოლო შეხვედრიდან რამდენიმე კვირაში შეერთებულმა შტატებმა 6,3 მილიარდი დოლარი გამოყო უკრაინის დასახმარებლად, გუშინ კი პრეზიდენტმა უკრაინისთვის მომდევნო, 675 მილიონის ტრანშიც დაადასტურა,“ – თქვა ოსტინმა გერმანიაში, რამშტაინის ფორმატის მეხუთე შეხვედრაზე.
მისი თქმით, დახმარების ეს პაკეტი მოიცავს:
- 105 მმ-იან ჰაუბიცებს;
- საარტილერიო საბრძოლო მასალებს;
- HARM-ის რაკეტებს;
- Humvee-ს მრავალპროფილიან მანქანებს;
- სასწრაფო დახმარების ჯავშანმანქანებს;
- ხელოვნური ინტელექტის სისტემებს;
- ცეცხლსასროლ იარაღს.
„დღეს შეერთებულმა შტატებმა უკრაინას 126 ჰაუბიცა გაუგზავნა და მსოფლიოს ქვეყნებთან ერთად ჩვენ 18-ჯერ გავზარდეთ ჰაუბიცების რაოდენობა უკრაინის დამცველებისთვის,“ – განაცხადა თავდაცვის მდივანმა.
ოსტინმა დასძინა, რომ კონტაქტური ჯგუფის პირველი შეხვედრის შემდეგ, შტატებმა და პარტნიორებმა, უკრაინას საერთო ჯამში, 26 შორსმოქმედი რეაქტიული საარტილერიო სისტემა მიაწოდეს.
7 სექტემბერს ტელეკომპანია CNN-მა წყაროებზე დაყრდნობით გაავრცელა ინფორმაცია, რომ აშშ-ის თავდაცვის უწყება მუშაობს უკრაინის შეიარაღებული ძალების დახმარების გრძელვადიან გეგმაზე, რომელიც გულისხმობს უკრაინის არმიის მხარდაჭერას ომის დასრულებიდან სულ მცირე ხუთი წლის განმავლობაში.
