დღეს, 23 აგვისტოს, უკრაინაში დროშის დღეს აღნიშნავენ.
ომში მყოფ ქვეყანას ეს დღე უკრაინის პრეზიდენტმა, ვოლოდიმირ ზელენსკიმ მიულოცა.
„ორი ფერის კომბინაცია, რომელიც ჩვენ ძალიან გვიყვარს, ვუფრთხილდებით და არასდროს გავცვლით სხვაზე. არასდროს არ ვცნობთ სხვის ფერებს ჩვენს მიწასა და ცაზე. ყოველთვის მზად ვართ დავიცვათ ჩვენი ლურჯ-ყვითელი დროშა,“ – განაცხადა ზელენსკიმ.
უკრაინის დროშაზე ყვითელი ფერი ხორბლის ყანებს აღნიშნავს, რომლითაც ცნობილია ეს ქვეყანა, ხოლო ლურჯი – უღრუბლო ცას ყანების თავზე.
მას შემდეგ, რაც 2022 წლის 24 თებერვალს რუსეთის ფედერაციის შეიარაღებული ძალები თავს დაესხა უკრაინას, ქვეყნის ლურჯ-ყვითელი დროშა ერთ-ერთი ყველაზე კარგად ცნობილი დროშაა მთელს მსოფლიოში. სოლიდარობის ნიშნად გამოფენილ უკრაინის დროშას მსოფლიოს მრავალ ქალაქში შეხვდებით.
უკრაინის დროშები ქალაქ ჩერნიგოვის სასაფლაოზე. ჩერნიგოვი ერთი თვის განმავლობაში იბომბებოდა რუსეთის შეიარაღებული ძალების მიერ. ქალაქი პირველ აპრილს გაათავისუფლეს უკრაინის შეიარაღებულმა ძალებმა. ფოტო: EPA-EFE/STR
