რუსულ მედიაში ვრცელდება რუსი სენატორის, ვლადიმერ ჯაბაროვის კომენტარი იმის შესახებ, რომ თუ ესტონეთი რუსეთს არ გადასცემს დარია დუგინას აფეთქებაში ბრალდებულს, რუსეთმა „მკაცრი ზომები“ უნდა მიიღოს ესტონეთის წინააღმდეგ.
საუბარია უკრაინის მოქალაქე ნატალია ვოვკზე, რომელიც დღეს, 22 აგვისტოს, რუსეთის ფედერალური უსაფრთხოების სამსახურმა კრემლის იდეოლოგის, ალექსანდრ დუგინის შვილის, დარია დუგინას აფეთქებაში დაადანაშაულა. FSB-ეს ცნობით, დუგინას მკვლელობის შემდეგ ვოვკი 12 წლის ქალიშვილთან ერთად გაემგზავრა ესტონეთში.
„თუ ესტონეთი უარს იტყვის რუსეთისთვის დამნაშავე ნატალია ვოვკის გადაცემაზე (ის, რომ უარს იტყვის, პრაქტიკულად ეჭვგარეშეა), რუსეთის ფედერაციას აქვს საფუძველი, რომ მკაცრი ზომები მიიღოს ესტონეთის სახელმწიფოს წინააღმდეგ, რომელიც ტერორისტს იფარებს“, – წერს რუსეთის ფედერაციის საბჭოს საერთაშორისო კომიტეტის ხელმძღვანელის პირველი მოადგილე, სენატორი ვლადიმერ ჯაბაროვი ტელეგრამზე.
ესტონეთის საზოგადოებრივი მაუწყებლის ცნობით, ესტონეთს ჯერ არ მიუღია რუსეთის ხელისუფლებისგან ოფიციალური მოთხოვნა ნატალია ვოვკის მიერ რუსეთ-ესტონეთის საზღვრის გადაკვეთაზე ინფორმაციის მიწოდების შესახებ.
ოფიციალური კიევი უარყოფს უკრაინის სპეცსამსახურების კავშირს დუგინას მანქანის აფეთქებასთან.
____________
ფოტოზე: დარია დუგინა. ფოტო: kp.ru