დუგინის პირველი კომენტარი შვილის აფეთქების შემდეგ

რუსი მილიარდერი, პარტია „მართლმადიდებლური რუსეთის“ წევრი, კონსტანტინ მალოფეევი, ტელეგრამზე ავრცელებს ტექსტს, რომელიც, მისივე თქმით, ალექსანდრ დუგინს ეკუთვნის, კრემლის იდეოლოგს, რომლის შვილიც, დარია დუგინა 20 აგვისტოს ააფეთქეს მანქანაში.

„როგორც იცით, უკრაინის ნაცისტური რეჟიმის მიერ განხორციელებული ტერაქტის შედეგად 20 აგვისტოს ჩემი შვილი, დარია დუგინა მხეცურად მოკლეს ჩემ თვალწინ აფეთქების შედეგად. ის შესანიშნავი მართლმადიდებელი გოგონა იყო, პატრიოტი, სამხედრო კორესპონდენტი, ცენტრალური არხების ექსპერტი და ფილოსოფოსი. მისი გამოსვლა და რეპორტაჟები ყოველთვის ღრმა, დასაბუთებული და მოზომილი იყო. იგი არასოდეს მოუწოდებდა ძალადობისა და ომისკენ.

ის ამომავალი ვარსკვლავი იყო. რუსეთის მტრებმა იგი მზაკვრულად, მალულად მოკლეს… მაგრამ ჩვენ, ჩვენს ხალხს, ასეთი აუტანელი დარტყმაც ვერ გატეხს. მათ სურდათ ჩვენი ნების ჩახშობა სისხლიანი ტერორით ჩვენგან საუკეთესოსა და დაუცველის წინააღმდეგ. მაგრამ ისინი ამას ვერ მიაღწევენ.

ჩვენს გულებს სწყურია არა მხოლოდ უბრალოდ შურისძიება. ეს ძალიან მცირეა, არა – რუსული. ჩვენ მხოლოდ ჩვენი გამარჯვება გვჭირდება. ჩემმა შვილმა სამსხვერპლოზე დადო თავისი სიცოცხლე. ასე, რომ გაიმარჯვეთ, გთხოვთ“, – ვკითხულობთ ტექსტში, რომელსაც კონსტანტინ მალოფეევი ავრცელებს ალექსანდრ დუგინის სახელით.

რუსეთის ფედერალურმა უსაფრთხოების სამსახურმა (FSB) დღეს, 22 აგვისტოს, განაცხადა, რომ ალექსანდრ დუგინის შვილის, დარია დუგინას მკვლელობის საქმე გახსნა. უწყება მომხდარში უკრაინის სპეციალურ სამსახურებს ადანაშაულებს.

ოფიციალური კიევი უარყოფს კავშირს აღნიშნულ აფეთქებასთან. „გუშინდელ აფეთქებასთან უკრაინას, რა თქმა უნდა, არანაირი კავშირი არ აქვს, რადგან ჩვენ არ ვართ კრიმინალური სახელმწიფო, როგორიცაა რუსეთი და მით უმეტეს, არ ვართ ტერორისტული სახელმწიფო,“ – თქვა პოდოლიაკმა.

ალექსანდრ დუგინი, კრემლის ერთ-ერთი პროპაგანდისტი და რუსული ულტრამემარჯვენე ტელევიზია ТВ-ს დამფუძნებელია. საჯარო სივრცეში ის პოზიციონირებს, როგორც პოლიტოლოგი და ფილოსოფოსი. ის მიიჩნევა „რუსული სამყაროს“ იდეოლოგად და აქტიურად ეწევა პროპაგანდას რუსეთის საზღვრებში პოსტსაბჭოთა ქვეყნების გაერთიანებაზე.

დარია დუგინა მამის იდეოლოგიასა და ხედვებს იზიარებდა. მასთან ერთად ის გამოდიოდა საჯარო ლექციებზე, ასევე, წერდა პროპაგანდისტული მედია RT-ისა და დუგინის დაფუძნებულ „Царьград“-ისთვის.