კრემლში აცხადებენ, რომ ფრანგული მხარის ინიციატივით შედგა ემანუელ მაკრონისა და ვლადიმერ პუტინის სატელეფონო საუბარი. ეს ორთვე-ნახევრის შუალედის შემდეგ ამ ორი ქვეყნის პრეზიდენტის პირველი საუბარია. ბოლოს მათ მაისის ბოლოს ისაუბრეს.
საუბარი ეხებოდა რუსი სამხედროების მიერ ოკუპირებულ უკრაინის ქალაქ ზაპოროჟიეში ატომური ელექტროსადგურის საკითხს.
„პრეზიდენტებმა ატომურ ელექტროსადგურზე გაეროს ატომური ენერგიის სააგენტოს მისიის გაგზავნის მნიშვნელობაზე ისაუბრეს, რომელიც შეძლებს ადგილზე ვითარების რეალურად შეფასებას. რუსულმა მხარემ დაადასტურა, რომ მზადაა სააგენტოს ინსპექტორები საჭირო დახმარებით უზრუნველყოს“, – წერია კრემლის განცხადებაში.
მაკრონის ადმინისტრაციის განცხადებით, პუტინთან სატელეფონო საუბრისას პრეზიდენტმა მაკრონმა კიდევ ერთხელ გაუსვა ხაზი, რომ შემაშფოთებელია საფრთხე, რასაც ზაპორიჟიეს ატომური ელექტროსადგური უქმნის ბირთვულ უსაფრთხოებას.
ელისეს სასახლის ცნობით, საუბრისას პრეზიდენტმა მაკრონმა დააყენა გაეროს ატომური ენერგიის სააგენტოს მისიის ზაპოროჟიეში რაც შეიძლება სწრაფად ჩასვლის საკითხი, რასაც პუტინიც დაეთანხმა.
„ორი პრეზიდენტი ამ თემაზე კვლავ ისაუბრებს უახლოეს დღეებში, მისიის ზაპოროჟიეში წარგზავნამდე მას შემდეგ, რაც ტექნიკურ ჯგუფები საკითხზე იმსჯელებენ“, – წერია საფრანგეთის პრეზიდენტის ადმინისტრაციის განცხადებაში.
—
ბოლო დღეებში რუსეთის თავდაცვა ირწმუნება, რომ კიევი ატომურ სადგურზე პროვოკაციას გეგმავს 19 აგვისტოს, როდესაც უკრაინაში გაეროს გენერალური მდივანი იქნება.
აშშ-ის ომის კვლევის ინსტიტუტის შეფასებით კი, რუსეთი სავარაუდოდ ქმნის საინფორმაციო საფუძველს ე.წ. False-flag ოპერაციისთვის, რათა ზაპოროჟიეს ატომურ სადგურზე პროვოკაცია უკრაინულ მხარეს დააბრალოს.
