ნეტგაზეთი • RU

ჩინეთი სამხედროებს გაგზავნის რუსეთში „ვოსტოკის“ წვრთნებში მონაწილეობის მისაღებად

ჩინეთის „სახალხო განმათავისუფლებელი არმიის“ ძალები გაემგზავრებიან რუსეთში და მონაწილეობას მიიღებენ საერთო სამხედრო წვრთნებში – „ვოსტოკ – 2022“. ინფორმაცია დღეს, 17 აგვისტოს, ჩინეთის სახალხო რესპუბლიკის თავდაცვის სამინისტრომ გაავრცელა.

როგორც სამინისტროს განცხადებაშია აღნიშნული, წვრთნებს რუსეთი უმასპინძლებს და მონაწილეობას მიიღებენ ინდოეთის, ბელორუსის, მონღოლეთის, ტაჯიკეთისა და სხვა ქვეყნების წარმომადგენლები.

ჩინეთის თავდაცვის სამინისტროს განცხადების მიხედვით, წვრთნებში მონაწილეობა ჩინეთსა და რუსეთს შორის მიმდინარე ორმხრივი ყოველწლიური თანამშრომლობის შეთანხმების ნაწილია და „არ არის დაკავშირებული მიმდინარე საერთაშორისო და რეგიონულ მდგომარეობასთან“.

როგორც გამოცემა „როიტერსი“ წერს, ერთობლივი სამხედრო წვრთნები სახელწოდებით „ვოსტოკი“ [აღმოსავლეთი], მოსკოვმა გასულ თვეში დააანონსა. მაშინ გავრცელებული ინფორმაციით, წვრთნები 30 აგვისტოდან 5 სექტემბრამდე შუალედში გაიმართება და მონაწილეობას მიიღებენ უცხოური სამხედრო ძალებიც, თუმცა ქვეყნები დასახელებული არ ყოფილა.

რუსეთმა ბოლო მსგავსი სამხედრო წვრთნები 2018 წელს ჩაატარა და ჩინეთი პირველად მონაწილეობდა მასში.

ჩინეთის სახალხო რესპუბლიკის თავდაცვის სამინისტროს განცხადებაში ვკითხულობთ, რომ წვრთნების „მიზანია მონაწილე ქვეყნების ჯარებს შორის პრაქტიკული და მეგობრული თანამშრომლობის გაღრმავება, სტრატეგიული თანამშრომლობის დონის ამაღლება და უსაფრთხოების სხვადასხვა საფრთხეზე რეაგირების უნარის გაძლიერება“.

_________

მთავარი ფოტო: ჩინელი და რუსი საზღვაო საზღვაო ქვეითები. 2016 წელი, აგვისტო. ჩინეთის პროვინცია გუანგდონში რუსეთისა და ჩინეთის ერთობლივი საზღვაო წვრთნები. ჩინეთის სამთავრობო მედია Xinhua

_________

ამავე თემაზე: 

რუსეთი ეძებს მხარდაჭერას, მაგრამ ჩინეთი პრაქტიკულ დონეზე ნეიტრალურია – კულება

ნეტგაზეთის მასალების სხვა გამოცემებში გადაბეჭდვის წესი
ავტორი
ირმა დიმიტრაძე არის გაზეთ "ბათუმელების" რეპორტიორი 2016 წლიდან