საქართველოს საავტომობილო გზების დეპარტამენტის ინფორმაციით, შიდასახელმწიფოებრივი მნიშვნელობის ბათუმი [ანგისა]-ახალციხის საავტომობილო გზის 125-ე კმ-ზე არის მიწა-კლდის მასის ჩამოშლის და გზის სავალი ნაწილის დაზიანების საშიშროება, რის გამოც აღნიშნულ მონაკვეთზე, შესაბამისი ღონისძიებების გატარებამდე, აკრძალულია ყველა სახის ავტოტრანსპორტის მოძრაობა.
გზების დეპარტამენტში დღეს, 17 აგვისტოს, „ბათუმელებს“ უთხრეს, რომ გზა [ხულო-ზარზმის მე-2 ლოტის მშენებლობის არეალში] სოფელ უტყისუბანთან [ზარზმის თემი] არის გადაკეტილი.
„კლდის მასის ჩამოშლის საშიშროების აღმოსაფხვრელად შესაბამისი ღონისძიებების გატარებას შესაძლოა 2-3 დღე დასჭირდეს,“ – გვითხრეს გზების დეპარტამენტში.
ამავე უწყების ინფორმაციით, ბათუმიდან უტყისუბნამდე მოძრაობა მთელ მაგისტრალზე თავისუფალია.
ბათუმი-ახალციხის მაგისტრალის დაზიანებული მონაკვეთი სადაც გზა გადაკეტილია / ივერი ბალახაშვილის ფოტო
