მთავარი,სიახლეები

უკრაინამ „სახანძრო წესების დარღვევა“ უწოდა აფეთქებას ოკუპირებულ ყირიმში

16.08.2022 • 814
უკრაინამ  „სახანძრო წესების დარღვევა“ უწოდა აფეთქებას ოკუპირებულ ყირიმში

დღეს, 16 აგვისტოს, ბრიფინგზე, უკრაინის შეიარაღებული ძალების საჰაერო ძალების პრესმდივანმა  ოკუპირებულ ყირიმში დღეს დილას მომხდარ აფეთქებებს „სახანძრო უსაფრთხოების წესების შეუსრულებლობა“ უწოდა.

„ამ მოვლენებთან დაკავშირებით უკრაინის უმაღლესი სამხედრო ხელმძღვანელობის ოფიციალური პოზიცია არსებობს – სიგიჟეა, მოწინააღმდეგემ არ იცის როგორ გამოიყენოს ხანძარსაწინააღმდეგო ზომები. მაგრამ ჩვენ, ყველას, რა თქმა უნდა, ეს გვახარებს. არა მარტო სამხედროებს, არამედ მთელ უკრაინას“, – განაცხადა იგნატმა.

მან იმედი გამოთქვა, რომ „სახანძრო უსაფრთხოების წესების დარღვევის“ შედეგად მტერი დაკარგავს სამხედრო აღჭურვილობასა და შემადგენლობას.

მისივე თქმით, რუსეთის დღევანდელ დანაკარგებზე ყირიმში ჯერ ადრეა საუბარი, თუმცა უკრაინულ დაზვერვას უკვე აქვს გარკვეული ცნობები. მან დასძინა, რომ მალე ინტერნეტში, სავარაუდოდ, სატელიტური ფოტომასალაც გამოჩნდება.

დღეს, 16 აგვისტოს, ყირიმის ნახევარკუნძულზე, რომელიც რუსეთის ფედერაციის შეიარაღებული ძალების მიერაა ანექსირებული, ქალაქ ჯანკოიში, მაისკოეს დასახლების სიახლოვეს, სამხედრო საწყობში აფეთქებები მოხდა. რუსეთმა მომხდარს ამჯერად დივერსია უწოდა.

_____________________

ფოტო: ინტერფაქსი

გადაბეჭდვის წესი


ასევე: